Artıq üçüncü ildir ki, ölkəmizdə keçirilən "Ən
yaxşı ümumtəhsil məktəbi" və "Ən yaxşı müəllim"
müsabiqələrinin I mərhələsinə yekun vurulub.
Təhsil Nazirliyindən aldığımız məlumata əsasən,
"Ən yaxşı müəllim" müsabiqəsində iştirak etmək
üçün 460 nəfər sənəd verib.
Müəllimlərin sənədləri müvafiq əmsal tətbiq
olunmaqla 16 göstərici üzrə 10 ballıq sistemlə
qiymətləndirilib və 203 nəfər növbəti mərhələyə
buraxılıb.
Müsabiqə iştirakçıları arasında bu il də say
etibarı ilə ibtidai sinif və ingilis dili
müəllimləri üstünlük təşkil edirlər. Belə ki,
203 nəfərdən 47-si ibtidai sinif, 40-ı isə
ingilis dili müəllimidir. İştirakçılardan 19-u
tarix, 17-si Azərbaycan dili və ədəbiyyat, 16-sı
riyaziyyat, 12-si coğrafiya, 10-u biologiya,
8-i fizika, 7-si informatika, 7-si rus
bölməsində rus dili, 6-sı kimya, 5-i fiziki
tərbiyə, 4-ü alman dili müəllimidir. Fransız
dili, Azərbaycan bölməsində rus dili, əmək
hazırlığı, musiqi, təsviri incəsənət fənlərinin
hər birini 1 müəllim təmsil edir.
"Ən yaxşı müəllim" müsabiqəsinin ikinci
mərhələsində iştirak edən 203 müəlimin aprelin
20-dən etibarən Bakının 26 məktəbində sınaq
dərslərinin dinlənilməsinə başlanılıb.
"Ən yaxşı ümumtəhsil məktəbi" müsabiqəsində isə
iştirak etmək üçün 123 məktəb müraciət etmişdir.
Bunlardan 49-u Bakı şəhərinin məktəbləridir. Bir
məktəb (Azərbaycan Milli Konservatoriyası
tərkibində Respublika İncəsənət Gimnaziyası)
bilavasitə Təhsil Nazirliyinin tabeliyində
olandır. Yevlax, İsmayıllı ,Ağstafa və Ağsu
rayonlarının hər birindən 4, Sumqayıt və Şirvan
şəhərlərinin, Cəlilabad, Tovuz, Masallı,
Hacıqabul, Kürdəmir və Quba rayonlarının hər
birindən 3 məktəb müsabiqəyə sənəd təqdim
etmişdir. Müraciət edən məktəblərin 33-ü digər
rayon və şəhərlərdəndir.
Müsabiqədə iştirak etmək üçün sənədləri qəbul
edilmiş 123 məktəbin Təhsil Nazirliyində
yaradılmış işçi qrupu tərəfindən göstəriciləri
müəyyən edilmiş şərtlər daxilində müvafiq
əmsallar tətbiq olunmaqla 17 parametr üzrə
qiymətləndirilib və buna uyğun olaraq hər bir
məktəbə bal verilib. Təşkilat Komitəsinin
qərarı ilə 123 məktəbdən 94-ü II mərhələyə
buraxılıb.
Samirə KƏRİMOVA |