"Milli pedaqogika məktəbi" elmi-pedaqoji, bədii-publisistik jurnalının yeni, 2010-cu ilin 1-ci nömrəsi işıq üzü görüb. Jurnalın ilk bölməsi "Pedaqogikanın ümumi məsələləri" adlanır. Baş məqalə pedaqoji elmlər doktoru, professor Nurəddin Kazımovun 14 cildlik "Seçilmiş əsərləri"nə həsr olunur. Məqalənin müəllifi jurnalın təsisçisi və baş redaktoru, pedaqoji elmlər doktoru, professor Fərahim Sadıqovdur. Məqalədə Azərbaycan Respublikası Prezidentinin fərdi təqaüdçüsü, əməkdar elm xadimi, pedaqoji elmlər doktoru, professor Nurəddin Kazımovun 14 cildlik əsərlər toplusunun hər bir cildinin qısa təhlili verilmişdir.

Jurnalın ikinci bölməsi "Didaktika bölməsi" adlanır. Bölmənin ilk məqaləsi S.Bəhlulzadə adına Xarici dillər təmayüllü gimnaziyanın sinif müəllimi Şəhla Aslanovanın "Fənn kurikulumunun səmərəli tətbiqi müəllimin peşəkarlığından asılıdır" yazısıdır.

Həmin gimnaziyanın digər sinif müəllimi İradə Məlikovanın "Fəal təlim texnologiyalarını necə tətbiq edirəm" adlı məqaləsi də bu bölmənin diqqətçəkən yazılarındandır.

Adıçəkilən bölmənin növbəti yazısını TPİ-nin elmi işçisi Mətanət Sadıqova "İbtidai siniflərin oxu dərslərində fəal (interaktiv) təlim metodlarından istifadənin imkanları" başlığı altında təqdim etmişdir.

Bakı şəhər 5 nömrəli orta məktəbin ibtidai sinif müəllimi Fatimə Xəzri-Mirzəyevanın "Fənn kurikulumunun tətbiqi fəal təlimə əsaslanır" məqaləsi də sözügedən bölmənin maraqlı yazılarındandır.

Jurnal savadlı, tədqiqatçı tələbələrin yazılarına da diqqətlə yanaşır və səhifələrində belə yazılara daim yer ayırır. Nümunə olaraq Bakı Slavyan Universitetinin pedaqogika nəzəriyyəsi və tarixi ixtisası üzrə II kurs magistrantı Nigar Hüseynovanın "İbtidai siniflərdə fəal təlim zamanı qruplarla işin təşkili" məqaləsini göstərə bilərik.

Bölmənin sonuncu məqaləsi isə Azərbaycan Universitetinin alman dili müəllimi Arzu Həmidzadənin "İnteraktiv dərsə verilən müasir tələblər" yazısıdır.

"Tərbiyə nəzəriyyəsi bölməsi" də jurnalın ən önəmli bölmələrindən biridir.

Bölmənin ilk məqaləsi isə BSU-nun dosenti, pedaqoji elmlər namizədi Ayaz Qasımovun "Beynəlmiləlçilik tərbiyəsinə yeni baxış" adlanır.

"Yaşıl dünya" jurnalının redaktoru Yeganə İbrahimovanın "Qurani-Kərim"də əxlaq tərbiyəsi" yazısını da bu günümüz üçün çox əhəmiyyətli hesab etmək olar.

"Mənəvi tərbiyə"nin düzlük, doğruluq, xeyirxahlıq, əməksevərlik və s. komponentləri haqqında ARTPİ-nin elmi işçisi Böyükxanım Zülfüqarovanın "Məktəbəqədər yaşlı uşaqlarda mənəvi keyfiyyətlərin formalaşdırılması" məqaləsi də jurnalın 2-ci bölməsində yer alıb.

Professor İ.M.Aydınovun "Q.Ş.Kazımovun müasir Azərbaycan dili dərsliyi haqqında düşüncələr" adlı məqaləsi isə jurnalın "Pedaqoji rəy və düşüncələr bölməsi"ndə verilib.

Jurnalda rus dilində yazılan məqalələr üçün də xüsusi bölmə ayrılıb. BSU-nun prorektoru, fəlsəfə elmləri doktoru, professor Məmməd Əliyevin "Müasir mərhələdə dinşünaslığın tədrisinin aktuallığı" adlı məqaləsi və digər yazılar bu bölmədə verilib.

İnanırıq ki, əvvəlki nömrələr kimi, jurnalın növbəti nömrəsi də oxucuların marağına səbəb olacaqdır. 

Şəfiqə TAHİROVA,
Azərbaycan Respublikası Təhsil Problemləri İnstitutunun dissertantı