Fəyyaz İldırımzadə Bakı şəhərindəki 200 nömrəli Bağça-məktəb-lisey kompleksinin X sinfində oxuyur. İdmanın karate növü üzrə 6 yaşından məşqçi Yusif Cəfərovun rəhbərliyi altında "Musado" idman klubunda məşğul olmağa başlayıb.

Nəhayət, gərgin məşqlər öz bəhrəsini verir və çox keçmir ki, Fəyyaz peşəkar idmanda uğurlar əldə etməyə başlayır. O, 2006-cı ildə "Qara kəmər ustası" adına layiq görülür. 2007-ci ildə Sumqayıt şəhərində keçirilən beynəlxalq Şotokan karate-do üzrə üçüncü açıq çempionatda III yeri tutur. 2008-2009-cu illərdə isə gənclər arasında ümumilikdə üçqat ölkə çempionu adını qazanır. Onun üçün 2010-cu il daha əlamətdar olub. Karate ustamız fevralın 5-7-də Türkiyənin İzmir şəhərində keçirilən 37-ci Avropa birinciliyində qızıl medal qazanaraq ən yüksək uğurunu əldə edir.

Qitə birinciliyində çempionluğa gedən yolda dörd rəqibinə qalib gəlmiş idmançımızla bu günlər redaksiyamızda görüşdük. O, yarış təəssüratlarını bizimlə belə bölüşdü: "Mən Avropa birinciliyinə çox ciddi hazırlaşmışdım. Məqsədim  yüksək nəticə əldə etmək idi. İlk rəqibim makedoniyalı karateçi idi. Ona bir xal fərqi ilə qalib gəldim. Sonra Serbiya karateçisi ilə qarşılaşdım. Ən çətin döyüşüm də bu idmançı ilə oldu. Onu 6:4 hesabı ilə üstələdim.  Bu gərgin yarışın finalında fransalı rəqibimə 5:0 hesabı ilə qalib gəldim".

Onu da qeyd edək ki, gənclərdən ibarət yığmanın aparıcı üzvlərindən olan Fəyyaz İldırımzadə bu uğurlarla kifayətlənmək niyyətində deyil. Onun əsas məqsədi gənclər, gələcəkdə isə böyüklər arasında dünya çempionu adını qazanmaqdır. İdmançımızı qarşıda Amerikada keçiriləcək nüfuzlu beynəlxalq turnir, Serbiyada təşkil olunacaq dünya çempionatı və digər yarışlar gözləyir.

"Arzum dünya çempionu olmaqdır", - deyən Fəyyaza doğma Azərbaycanımızın idman şərəfini qorumaq yolunda uğurlar diləyirik!

Ədalət DAŞDƏMİRLİ