ABŞ-ın Azərbaycandakı səfirliyi FLEX (Future leaders exchange program) mübadilə proqramı çərçivəsində Amerika orta məktəblərində təhsil almaq üçün seçilmiş 42 Azərbaycan məktəblisinin şərəfinə qəbul təşkil etmişdir.

AzərTAc xəbər verir ki, ABŞ səfirliyinin müvəqqəti işlər vəkili Donald Lu tədbirdə çıxış edərək demişdir: "Mən sizə görə çox sevinirəm, çünki sizin ABŞ haqqında təkcə kitablar və filmlər vasitəsilə deyil, yeni tanışlıqlar və Amerika ailəsində yaşamaq vasitəsilə məlumat əldə etmək şansınız var".

O qeyd etmişdir ki, Azərbaycan məktəbliləri müəyyən mənada öz ölkəsinin elçiləri olacaq və Amerika mədəniyyəti ilə tanış olmaq imkanı əldə edəcəklər.

2004-2005-ci illərdə FLEX proqramının iştirakçısı olmuş, 2009-cu ildə "Eurovision" müsabiqəsində Azərbaycanı təmsil etmiş müğənni Aysel Teymurzadə də məktəbliləri təbrik etmişdir.

Bakı, Gəncə, Mingəçevir, Lənkəran, Şəki və Naxçıvan məktəblərini təmsil edən qaliblər 2000-dən çox namizədin arasından seçilmişlər.

FLEX proqramı ABŞ Dövlət Departamenti tərəfindən maliyyələşdirilir. 1993-cü ildə bu proqram həyata keçirilməyə başlayandan bəri Azərbaycan orta məktəblərinin 800-ə yaxın şagirdi həmin proqramda iştirak etmişdir.

AzərTAc