Aprelin 27-də Bakıdakı  "Hyatt Regency" otelinin "Quba" zalında "Məktəbli gənclər Heydər Əliyev zəkasının işığında" mövzusunda Bakı şəhər ümumtəhsil məktəbləri şagirdlərinin yaradıcılığına həsr olunan konfransın yekun mərhələsi və qaliblərin mükafatlandırılması mərasimi  keçirildi.

Azərbaycan Respublikasının Dövlət himni səsləndirildikdən sonra Bakı Şəhəri üzrə Təhsil İdarəsinin müdiri Nailə Rzaquliyeva çıxış edərək bu il aprelin 10-da keçirilmiş "Məktəbli gənclər Heydər Əliyev zəkasının işığında" mövzusunda Bakı şəhər ümumtəhsil məktəbləri şagirdlərinin yaradıcılığına həsr olunan konfrans haqqında məlumat verdi.  Nailə Rzaquliyeva öz mahiyyətinə görə elmi, yaradıcı olmaqla yanaşı, qabiliyyət və istedadın üzə çıxarılmasına imkan verən bu konfransın qaliblərinə müvəffəqiyyətlər arzuladı.

Tədbir iştirakçıları ulu öndər Heydər Əliyevin və onun  layiqli davamçısı ölkə Prezidenti cənab İlham Əliyevin təhsil sahəsində gördükləri işlərlə bağlı ayrı-ayrı məqamları əks etdirən "Azərbaycan-dünyam mənim" adlı sənədli  filmə tamaşa etdilər.

Mərasimdə münsiflər heyəti tərəfindən işləri yüksək qiymətləndirilən  bir necə şagirdin müxtəlif mövzularda təqdimatları oldu.

Sonra konfransda ən yaxşı yaradıcılıq işi ilə fərqlənmiş 50-yə yaxın şagirdə Bakı Şəhəri üzrə Təhsil İdarəsinin diplom və hədiyyələri təqdim edildi. Mərasimdə həmçinin ümummilli lider Heydər Əliyevin anadan olmasının 87-ci ildönümü münasibətilə keçirilən inşa müsabiqəsinin  Bakı şəhəri üzrə qalibləri olan 11 şagird də mükafatlandırıldı.

Konfransda AMEA-nın müxbir üzvü, professor Vaqif Abbasov, Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva, Mətbuat Şurasının sədri Əflatun Amaşov, Binəqədi Rayon İcra Hakimiyyətinin başçısı Alı Qocayev son illər Azərbaycan təhsilinin uğurlu inkişafından, ölkə Prezidenti cənab İlham Əliyev tərəfindən təhsilə göstərilən qayğıdan söz açdılar.

Mərasimi təhsil naziri Misir Mərdanov yekunlaşdıraraq ulu öndərimiz Heydər Əliyevin müəllimlərə hər zaman xüsusi hörmətlə yanaşdığını, onların əməyini yüksək dəyərləndirdiyini qeyd etdi. Dahi şəxsiyyətin müəllim haqqında dediyi  dəyərli fikirləri mərasim iştirakçılarının diqqətinə çatdıran təhsil naziri hazırda onun layiqli davamçısı, ölkə başçısı cənab İlham Əliyev tərəfindən Azərbaycan təhsilinin, elminin inkişafına diqqət və qayğı  göstərildiyini xüsusi vurğuladı. Nazir istedadlı şagirdlərin üzə çıxarılmasında, onların yaradıcılıq potensialının inkişafında  belə tədbirlərin keçirilməsinin müstəsna əhəmiyyəti olduğunu bildirdi, bütün qalibləri təbrik etdi.

Samirə KƏRİMOVA