Bu günlərdə Rusiya İnformasiya Mədəniyyət Mərkəzində 1941-1945-ci illər müharibəsində qələbənin 65-ci ildönümünə həsr olunan məktəblilərin  rus dili və ədəbiyyatı olimpiadasının qaliblərinin mükafatlandırılması mərasimi keçirildi. Azərbaycan Respublikası Təhsil Nazirliyi, Rusiya Federasiyasının ölkəmizdəki səfirliyi və Rusiya İnformasiya Mədəniyyət Mərkəzinin  birgə tədbirlər planı çərçivəsində keçirilən olimpiadaya Bakı və Sumqayıt şəhərlərinin, eləcə də respublikanın bir sıra bölgələrinin məktəblərindən 100-ə yaxın IV-VII sinif şagirdləri qatılıb. Ən yüksək nəticələr göstərmiş məktəblilər olimpiadanın qalibləri seçilib.

Mərasimi Rusiya İnformasiya Mədəniyyət Mərkəzinin rəhbəri Ənvər Şeyxov açaraq olimpiadanın əhəmiyyətinə toxundu. Şagirdlərin rus dilinə olan  marağının artmasından, həmin dildə mükəmməl danışaraq fikirlərini sərbəst çatdırmalarından razılıq  hissi ilə danışan Ə.Şeyxov bütün qaliblərə uğurlar arzuladı.

Çıxış üçün söz alan Rusiya Federasiyasının ölkəmizdəki səfirliyinin böyük müşaviri Vladimir Pozdorovkin Azərbaycanla Rusiya arasındakı dostluq əlaqələrindən, ölkələrimizin təhsil sahəsindəki əməkdaşlığından danışdı. Olimpiadada yaxşı nəticələri ilə fərqlənən azərbaycanlı şagirdləri təbrik edən V.Pozdorovkin onlara uğurlarının davamlı olmasını arzu etdi. Daha sonra çıxış edənlərdən Təhsil Nazirliyinin əməkdaşları Sevil Məmmədova, Natiq Əliyev, olimpiadanın keçirilməsinə sponsorluq etmiş "VTB-Azərbaycan" bankının maliyyə məsələləri üzrə direktoru Şahin Mirzəyev məktəblilərə ən xoş istəklərini çatdırdılar.

Təbrik çıxışlarından sonra olimpiadada I-II-III yerlərə layiq görülən şagirdlərə fəxri fərman və hədiyyələr, rus dili və ədəbiyyatı  müəllimlərinə isə uşaqları yüksək səviyyədə hazırlaşdırdıqlarına görə təşəkkür məktubları təqdim olundu.

Tədbir Bakıdakı 145 nömrəli orta məktəbin şagirdlərinin hazırladıqları ədəbi- bədii kompozisiya ilə sona çatdı. 

Samirə KƏRİMOVA