Bu günlərdə Rəşid Behbudov adına Dövlət Mahnı Teatrında  "Xalq   qəzeti"nin fotomüxbiri, YUNİSEF və "Qızıl Qələm" mükafatları laureatı Rafiq Salmanovun yeni çapdan çıxmış "Mənim könlüm deyir ki..." kitabının təqdimatı və 60 illik yubileyi keçirildi.

 Mədəniyyət və Turizm Nazirliyinin təşəbbüsü və təşkilatçılığı ilə keçirilən mərasimdə respublikanın bir çox incəsənət və mədəniyyət xadimləri, millət vəkilləri, digər qonaqlar iştirak edirdilər.

  Tədbiri giriş sözü ilə açan Mədəniyyət və Turizm Nazirliyinin şöbə müdiri Lətifə Məmmədova Azərbaycan ifaçılıq sənətində özünəməxsus yer tutan sənətkarlarımız haqqında silsilə məqalələr hazırlayan və onların sənət aləminə əsrarəngiz rəng qatan R.Salmanova nazirliyin Fəxri fərmanını təqdim edərək, yubilyara gələcək yaradıcılığında uğurlar və cansağlığı arzuladı.

Sonra "Xalq qəzeti"nin baş redaktoru Həsən Həsənov çıxış edərək, R.Salmanovun milli mətbuata verdiyi töhfələrdən söz açdı. O, Rafiq müəllimin böyük zəhmət hesabına ərsəyə gətirdiyi kitabdan danışaraq, onun yüksək yaradıcılıq qabiliyyəti olduğunu və bundan səmərəli şəkildə istifadə etdiyini qeyd etdi. H.Həsənov kitabın ərsəyə gəlməsində əməyi olan hər bir şəxsə, xüsusən də Azərbaycan mədəniyyətinin dostu, kitabın nəşrinə maliyyə dəstəyi vermiş Bakı Metropoliteninin rəisi Tağı Əhmədova minnətdarlığını bildirdi.

Mərasimdə ustad xanəndələrimiz Əlibaba Məmmədov, professor Arif Babayev,  Canəli Əkbərov  R.Salmanovu 60 illik yubileyi münasibətilə təbrik etdilər. Azərbaycan musiqisinin korifeylərini bu kitabda cəmlədiyinə görə ona təşəkkür etdilər.

Tədbirdə  çıxış edən  Milli Məclisin deputatları Miri Qənbərov və Vahid Əhmədov  Rafiq Salmanovun ərsəyə gətirdiyi  "Mənim könlüm deyir ki..." kitabının işıq üzü görməsində "Xalq qəzeti"nin və onun baş redaktoru Həsən Həsənovun böyük əməyini yüksək dəyərləndirdilər. Onlar belə nəşrlərin gələcək nəsillər ücün böyük töhfə olduğunu və milli mədəni irsimizin qorunub saxlanılmasına xidmət etdiyini  vurğuladılar.

Ön sözün müəllifi,  Milli Konservatoriyanın rektoru, xalq artisti Siyavuş Kərimi  R.Salmanovun  bu kitabının musiqi ifaçılarımızın dünəni, bugünü və sabahı barədə əhatəli sənədli əsər təsiri bağışladığını və bu əsərin daim qəlblərdə xüsusi yür tutacağını bildirdi.

Xalq şairi Zəlimxan Yaqub yubilyarı təbrik edərək onun haqqında xoş fikirlər səsləndirdi. O bildirdi ki, R.Salmanov yaxşı jurnalist olmaqla bərabər, həm də etibarlı dost, sədaqətli ailə başçısı və qayğıkeş atadır. Bütün bu yüksək keyfiyyətlərilə bərabər, onun həm də yüksək musiqi duymaq və bu musiqiləri dəyərləndirmək bacarığı var. Məhz bu keyfiyyətlər belə bir gözəl məzmunlu kitabın yaranmasına, onun oxunaqlı olmasına stimul verir.

Xalq  artistləri Ramiz Quliyev, Flora Kərimova, Nazpəri Dostəliyeva, Brilliant Dadaşova, Mələkxanım Əyyubova,  əməkdar artistlər Gülüstan Əliyeva, Mətanət İsgəndərli və digər incəsənət ustaları öz gözəl ifaları ilə mərasim iştirakçılarına  xoş ovqat bəxş etdilər.   

Niyazı RƏHİMOV