Aprelin
7-də Bakıdakı 46 nömrəli Məktəbdənkənar Tərbiyə
İşi Mərkəzinin uşaq şəhərciyində Bakı Şəhər
Dövlət Yol Polisi İdarəsi, Xətai Rayon Polis
İdarəsi və mərkəzin təşkilatçılığı ilə tədbir
keçirildi.
Ulu öndər Heydər Əliyevin anadan olmasının 87-ci
ildönümü münasibətilə "Diqqət, piyada" devizi
altında hərəkətin təhlükəsizliyi aylığı
çərçivəsində "Yol hərəkəti qaydaları və mən"
mövzusunda keçirilən tədbirdə mərkəzin müəllim
kollektivi, Azərbaycan Respublikası DİN Baş
Dövlət Yol Polisi İdarəsinin şöbə rəisi, polis
polkovnik-leytenantı Kamran Əliyev, Bakı Şəhəri
üzrə Təhsil İdarəsinin məsləhətçisi Rövşən
Əliyev, KİV nümayəndələri, Bakı rayonlarının
müxtəlif məktəblərindən 200-ə yaxın şagird və
digər şəxslər iştirak edirdilər.
Mərkəzin direktoru Rafiq Kazımov belə
tədbirlərin keçirilməsinin əhəmiyyətini
vurğulayaraq bildirdi ki, uşaqların yol hərəkəti
qaydalarını məktəb yaşlarında öyrənmələri və
buna əməl etmələri vacib amillərdəndir. Biz
çalışmalıyıq ki, şagirdlərimiz hərtərəfli
biliklərə yiyələnməklə yanaşı, hər gün
rastlaşdığımız problemlərə də hazır olsunlar.
Mərkəzdə şagirdlərin yol hərəkəti qaydalarının
öyrənilməsi üçün hər bir şəraitin olduğu qeyd
edildi. Bildirildi ki, mərkəz 1991-ci ildən
başlayaraq DYP ilə birgə "Yol hərəkəti
qaydaları" proqramı, "Uşaqlar və Yol
Təhlükəsizliyi Layihəsi"nə uygun məşğələlər,
gənc sürücülərin və fiqurlu velosiped sürənlərin
yarışlarını və s. təşkil etmişdir. Uşaqlarla
bağlı yol-nəqliyyat hadisələrinin profilaktikası
üzrə məktəb və məktəbəqədər tərbiyə
müəssisələrinin müəllimləri arasında
maarifləndirici tədbirlər nəticəsində minlərlə
uşağın həyatının itirilməsi və əlil olmasının
qarşısı alınmışdır.
Sonra polis polkovnik-leytenantı Kamran Əliyev
mərkəzlə Dövlət Yol Polisi İdarəsinin sıx
əməkdaşlıq etdiyini və bunun müsbət nəticələr
verdiyini qeyd etdi. Şagirdlərin maarifləndirmə
işi yüksək qiymətləndirilərək təqdirəlayiq hal
hesab edildi.
Şagirdlərin ifasında yol polisi işçilərinə həsr
olunmuş şeirlər və mahnılar səsləndi.
Sonda uşaqlar yol hərəkəti ilə bağlı səhnəciklər
göstərərək kiçik maşın və velosipedlərlə
şəhərciyi dövrə vurdular.
Niyazi RƏHİMOV |