Bakı Slavyan Universitetinin xarici ölkələrin nüfuzlu təhsil ocaqları və  mədəniyyət mərkəzləri ilə  qarşılıqlı  əlaqələr sistemində Avropa  universitetləri xüsusi yer tutur.

2002-ci ildə Bakı Slavyan Universiteti ilə Fransanın məşhur Şərq Dilləri və Mədəniyyətləri Milli İnstitutu (İNALKO) arasında elmi əməkdaşlıq müqaviləsi  imzalanmışdır. İNALKO-nun prezidenti Jak Legrenin 2007-ci ilin iyulunda BSU-da olarkən mövcud   müqaviləyə əlavələr edilmiş   və bu  əlavələrdə  digər  elmi  əməkdaşlıq formaları ilə yanaşı, "Yay məktəbi"nin təşkil edilməsi də nəzərdə tutulmuşdur.  İNALKO  universitetinin  BSU-ya  gələn  professorları  cənab Tomas  Zende və xanım Sibel  Berk 28 iyun-3 iyul tarixlərində universitetin Roman-German filologiyası kafedrası müəllimlərinə elmi- metodik seminarlar təşkil etmiş,  Roman-German  ixtisasında təhsil alan tələbələrə isə  intensiv şəkildə  praktik fransız dili kursları keçmişlər. Bu seminarlar təkcə  universitet auditoriyalarında deyil, həm də  Bakıda fəaliyyət göstərən Jorj  Sand adına Fransa Mədəniyyət Mərkəzinin zəngin  kitabxanasında da keçirilmiş, fransız dili və ədəbiyyatını öyrənən gənclər  tərəfindən böyük maraqla  qarşılanmışdır.  

Şakir CƏFƏROV