Azərbaycan Respublikası Dövlət Neft Şirkətində (ARDNŞ) reallaşdırılan təqaüd proqramının başlıca məqsədlərindən biri Azərbaycan gənclərinin dünyanın ən yaxşı ali məktəblərində təhsil almasını, şirkət üçün yüksək ixtisaslı mütəxəssislər hazırlanmasını təmin etməkdir. Hazırda bu proqram çərçivəsində 41 gənc ABŞ, Böyük Britaniya, Fransa, Almaniya, Türkiyə və Avropanın digər nüfuzlu universitetlərində təhsil alır və daha 20 tələbə isə bu ildən proqrama qoşulur.

Şirkətin mətbuat xidmətindən bildirmişlər ki, iyulun 28-də ARDNŞ-ın baş ofisində təqaüd proqramı xətti ilə ABŞ və Avropanın aparıcı universitetlərində təhsil alan, hazırda isə yay tətillərini doğma Vətəndə keçirən tələbələrlə, eləcə də proqramın yeni qalibləri ilə görüş keçirilmişdir.

Tədbirdə ARDNŞ-ın kadr, rejim və informasiya texnologiyaları üzrə vitse-prezidenti Xaliq Məmmədov Azərbaycan Prezidenti İlham Əliyevin gənclərə göstərdiyi diqqət və qayğıdan danışmışdır. Bildirmişdir ki, qloballaşan dünyada Azərbaycanın enerji sektorunda yüksəkixtisaslı, parlaq istedada malik gənc kadrlara tələbatın yüksək olduğunu nəzərə alan şirkət də ölkə daxilində və xaricdə təhsil alan tələbə və gənc mütəxəssislərlə sıx əməkdaşlıq edir. Şirkətin təqaüd proqramı haqqında iştirakçılara ətraflı məlumat verən X.Məmmədov qeyd etmişdir ki, bu gün Azərbaycan gənclərinin dünyanın ən yaxşı ali məktəblərində təhsil almaları sabah ARDNŞ-ın beynəlxalq səviyyəli bir qurum kimi daha böyük nailiyyətlər qazanacağına əsas yaradır.

Sonra ali təhsil ocaqlarının bakalavr və magistr pillələrində təhsil alan tələbələr xaricdəki təhsilin özəllikləri, təcrübə prosesləri və üzləşdikləri problemlər haqqında danışmışlar. Onlar göstərilən dəstək və yaradılmış şəraitə görə təşəkkürlərini bildirmişlər.

AzərTAc