Rabitə və informasiya texnologiyaları naziri Əli
Abbasov xarici ölkələrin
informasiya-kommunikasiya texnologiyaları (İKT)
üzrə aparıcı universitetlərində təhsil alan
azərbaycanlı tələbələrlə görüşmüşdür.
Nazirlikdən AzərTAc-a verilən məlumatda
bildirilir ki, Ə.Abbasov dünyanın ən tanınmış
universitetlərində yüzlərlə azərbaycanlı gəncin
təhsil aldığını, bunların arasında İKT sahəsini
əhatə edən ixtisaslar üzrə təhsil alan
tələbələrin də olduğunu vurğulamışdır. Eyni
zamanda, nazir dövlətimizin başçısının
imzaladığı "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı" çərçivəsində Rabitə və İnformasiya
Texnologiyaları Nazirliyi tərəfindən "İKT üzrə
kadr hazırlığı proqramı"nın həyata keçirildiyini
qeyd etmişdir.
Ə.Abbasov indiyədək nazirlik tərəfindən 161
tələbəyə maddi-mənəvi dəstək göstərildiyini,
onların bakalavr, magistr və aspirantura
pillələrində təhsil almalarına nail olunduğunu,
azərbaycanlı tələbələrin təhsil aldıqları ali
məktəblər sırasında Macarıstanın Mərkəzi Avropa
Universiteti, ABŞ-ın Corc Meyson, Varvik,
Viskonsin universitetləri, İsveçrənin Bern və
Beynəlxalq universitetləri, Koreya
Respublikasının İxtisaslaşmış Elm və Texnologiya
İnstitutu, Böyük Britaniyanın London City
Universiteti, Türkiyənin Orta Doğu və Ankara
universitetləri, Ukraynanın Odessa Milli Rabitə
Akademiyası və digər tanınmış universitetlərin
əsas yer tutduğunu xatırlatmışdır.
Görüşdə nazir tələbələrin təhsil və məişət
problemləri ilə maraqlanmış, onların həll
edilməsi üçün lazımi tapşırıqlar vermişdir.
|