İyulun 27-də Almaniyanın Valkenburq bələdiyyəsinin Heiliq Hart Sibbe orta məktəbinin 10 şagirdi  gözdən əlil uşaqlar üçün respublika orta internat-məktəbində olmuşlar.

Almaniyalı şagirdlərin ölkəmizə səfəri Hollandiyada fəaliyyət göstərən "Vahid, Bölünməz və Demokratik Azərbaycan Uğrunda Birlik" cəmiyyətinin təşəbbüsü ilə baş tutmuşdur.

Cəmiyyətin sədri, Hollandiyada yaşayan soydaşımız İradə Uluxanlı bildirmişdir ki, səfərin təşkilində məqsəd ölkəmizin tarixi, mədəniyyəti ilə yaxından tanış olmaqdır.

Görüşdə internat-məktəbin direktoru N. Hüseynquliyev xüsusi qayğıya ehtiyacı olan uşaqların təhsili ilə bağlı dövlətimizin gördüyü işlərdən danışmışdır. Qeyd edilmişdir ki, Heydər Əliyev Fondunun prezidenti Mehriban xanım Əliyevanın birbaşa təşəbbüsü ilə təhsil ocağı yüksək səviyyədə təmir olunaraq, bütün zəruri avadanlıqla təchiz edilmişdir.

Sonra qonaqlar məktəbin kompüter mərkəzi, sinif otaqları və fənn kabinetləri ilə yaxından tanış olmuşlar.

Sonda almaniyalı şagirdlər tərəfindən məktəbə 4200 avro dəyərində xaricdə istehsal olunmuş "Brayl" çap aparatı hədiyyə edilmişdir.

Şakir CƏFƏROV