Yeni dərs ilində paytaxtımızın məktəbəqədər təhsil müəssisələrindən məktəbə yollanacaq 8 min 500-dən çox uşağın 55-i Yeni Günəşli yaşayış massivində yerləşən 23 nömrəli körpələr evi-uşaq bağçasının yetirməsidir. Bu günlərdə tərbiyə ocağında onların məktəbə yola salınması ilə əlaqədar təntənəli mərasim keçirildi. Tədbir "Sevimli vətən" mahnısının ifası ilə başlandı. Bağçanın həyətində qrup-qrup düzülmüş körpə fidanlar musiqi sədaları altında tədbirin keçirildiyi al-əlvan bəzədilmiş zala daxil oldular və əl-ələ tutub rəqs etdilər.

Sonra əllərində gül-çiçək yarpaqlarından çələnglər tutmuş uşaqlar mərasim iştirakçıları qarşısında müxtəlif kompozisiyalar nümayiş etdirdilər. Tədbirin aparıcıları onların sevincinə şərik olmağa gəlmiş anaları və qonaqları  salamladılar. Məktəbə gedəcəklərinə çox sevindiklərini deyən uşaqlar tərbiyəçiləri Şəfiqə Hüseynova, Rəna Qəhrəmanova, Günay Rüstəmova və Nərminə Mirməmmədovanın, musiqi rəhbəri Validə Quliyevanın səyləri nəticəsində artıq məktəb təliminə hazır olduqlarını bildirdilər.

Altıyaşlıların ana, vətən, məktəb, müəllim, oxumağın, öyrənməyin faydası haqqında söylədikləri şeirlər, ifa etdikləri müxtəlif mahnı və rəqslər, göstərdikləri səhnəciklər mərasim iştirakçıları tərəfindən maraqla qarşılandı. Uşaqların təqdim etdikləri baba və nənənin öz nəvələrinin məktəbə getməsini xatırlamalarına dair səhnəcik, "Turp" nağılı mövzusuna dair ingilis dilində kiçik tamaşanı, əlifbamızın hərfləri, yol hərəkəti qaydaları haqqında verdikləri məlumatlar, bayrağımızın rəngləri barədə söylədikləri şeirlər alqışlarla qarşılandı.

Nəhayət, mərasimin vida anı gəlib çatdı. Uşaqlar bağçada bir neçə il ərzində doğma anaları kimi onların nazını çəkmiş, təlim-tərbiyələri ilə məşğul olmuş, məktəb təliminə hazırlamış, sağlamlıqları keşiyində durmuş tərbiyəçilərə, pedaqoji kollektivin digər üzvlərinə minnətdarlıqlarını ifadə etdilər, onları heç vaxt unutmayacaqlarını söylədilər. Tərbiyəçilər isə yetirmələrini məktəbə getmələri münasibəti ilə təbrik edib onlara ən xoş arzularını bildirdilər, məktəbdə yaxşı oxumağı tövsiyə etdilər.

23 nömrəli körpələr evi-uşaq bağçasının müdiri Sevil Balayeva da tərbiyə ocağından pərvazlandırdıqları körpə fidanları təbrik edib valideynlərinə gözaydınlığı verdi.

Bakı Şəhəri üzrə Təhsil İdarəsi Xətai-Suraxanı metodik bölməsinin əməkdaşı Südabə Abdullayeva mərasimdə söz alaraq tədbirin yüksək səviyyədə hazırlandığını, 23 nömrəli bağçanın öz fəaliyyəti ilə paytaxtın sayılıb seçilən məktəbəqədər təhsil müəssisələrindən olduğunu bildirib tərbiyə müəssisəsinin kollektivinə daha böyük uğurlar arzuladı.

Tədbirin sonunda bu il məktəbə gedəcək uşaqlara "məzun" albomları və hədiyyələr, məktəbə hazırlıqda və mərasimdə öz maraqlı çıxışları ilə xüsusi fərqlənənlərə isə həm də şəhadətnamələr təqdim olundu.

Yusif ƏLİYEV