Azərbaycanın Yunanıstandakı səfiri Rəhman Mustafayev AzərTAc-a bildirmişdir: "Azərbaycanın Yunanıstandakı səfirliyinin təşəbbüsü ilə bu ölkənin nüfuzlu ali məktəblərindən biri olan Afina İqtisad Universitetində Azərbaycan xalqının ümummilli lideri Heydər Əliyev adına təqaüd təsis edilməsi planlaşdırılır".

Diplomat qeyd etmişdir ki, bu təqaüd Azərbaycana və Azərbaycan-Yunanıstan münasibətlərinə həsr edilmiş ən yaxşı elmi araşdırmaların müəllifləri olan tələbələrə veriləcəkdir.

Səfir demişdir: "Mən artıq Afina İqtisad Universitetinin rektoru ilə görüşmüşəm və o, həmin təşəbbüsü müsbət qarşılamışdır. Layihənin icrasına növbəti dərs ilindən başlamaq nəzərdə tutulur. Ən yaxşı işləri münsiflər heyəti müəyyənləşdirəcəkdir. Qaliblər təqaüdlə bərabər Azərbaycana səfər etmək imkanı qazanacaqlar".

R.Mustafayevin sözlərinə görə, bu təşəbbüs yunanıstanlı gənclərin Azərbaycana marağını özünəməxsus tərzdə təşviq edəcəkdir.