Avqustun 13-də Almaniyanın şimal şəhəri Flensburqda yerləşən məşhur Murvik Hərbi Dəniz Akademiyası 100 illik yubileyini qeyd etmişdir.

Təntənəli mərasimdə Almaniya dövlətinin başçısı Kristian Vulf da iştirak etmiş və təhsil müəssisəsinin kursantları ilə görüşmüşdür. Almaniya Prezidenti akademiyada təhsil alan xarici ölkələrin kursantları ilə də görüşmüşdür. Milli hərbi gündəlik - parad geyim forması geyinmiş kursantların cərgəsi önündən keçərkən Prezident onları salamlamış, hansı ölkəni təmsil etməsi ilə maraqlanmışdır. Kursantların sırasında Azərbaycan Ali Hərbi Dənizçilik Məktəbinin birinci kursunu müvəffəqiyyətlə başa vuraraq təhsilini davam etdirmək üçün dövlətimiz tərəfindən Murvikə göndərilmiş Nadir Azər oğlu Əliyev də var idi. Kursantın əlini hərarətlə sıxan Prezident Kristian Vulf cari ilin əvvəlində Azərbaycana səfərini xatırlamış və ölkəmiz haqqında xoş sözlər demişdir. Almaniyanın dövlət başçısı azərbaycanlı kursantın Murvik Hərbi Dəniz Akademiyasında təhsil almasını yüksək qiymətləndirmiş və ona uğurlar arzulamışdır.

Qeyd edək ki, Heydər Əliyev adına Azərbaycan Ali Hərbi Məktəbində, Azərbaycan Ali Hərbi Təyyarəçilik Məktəbində və Azərbaycan Ali Hərbi Dənizçilik Məktəbində təhsildə və idmanda xüsusilə fərqlənən kursantlar təhsillərini davam etdirmək məqsədi ilə xarici ölkələrə göndərilirlər. Nadir Əliyev C.Naxçıvanski adına Hərbi Liseyi müvəffəqiyyətlə bitirdikdən sonra Ali Hərbi Dənizçilik Məktəbinə daxil olmuşdur. Burada da təhsildə və idmanda xüsusilə fərqlənən Nadir Azərbaycan dövlətinin xətti ilə Almaniyaya göndərilmişdir.

AzərTAc