Sentyabrın 7-də Sumqayıtda, kimyaçıların Üzeyir Hacıbəyli adına Mədəniyyət sarayında şəhərin təhsil işçilərinin ənənəvi sentyabr konfransı keçirilmişdir. Şəhərin əsas pedaqoji şurasında 2009-2010-cu dərs ilinə yekun vurulmuş və qarşıdakı dərs ili üçün vəzifələr müəyyən edilmişdir.

Respublikanın təhsil naziri Misir Mərdanov və Sumqayıt Şəhər İcra Hakimiyyətinin başçısı Vaqif Əliyev konfransın işində iştirak etmişlər.

Konfrans başlamazdan əvvəl onun iştirakçıları və qonaqlar Mədəniyyət sarayının foyesində təşkil edilmiş məktəblilərin əl işlərindən ibarət sərgi ilə tanış olmuşlar. Burada Sumqayıt məktəblilərinin bu yaxınlarda birinci şəhər ekologiya forumunda və İNEPA layihəsi çərçivəsində keçirilmiş Beynəlxalq Ekologiya Olimpiadasında nümayiş etdirilmiş işləri sərgilənmişdir.

"Təfəkkür" liseyinin şagirdlərinin "Qida məhsullarının əhali demoqrafiyasına təsiri" adlı layihəsi qonaqların xüsusi marağına səbəb olmuşdur. İNEPA-nın bürünc medalına layiq görülmüş bu layihəni onun müəllifləri Efriz Ağayeva və Türkan  Nuriyeva  təqdim  etmişlər.

Müəllimlərin ənənəvi konfransı Azərbaycan Respublikasının Dövlət himninin ifası ilə başlanmışdır.

Şəhər təhsil şöbəsinin müdiri Vidadi Bağırovun məruzəsində qeyd edilmişdir ki, keçən dərs ili yüksək nəticələr göstərmiş şagirdlərin və onların müəllimlərinin uğurları ilə əlamətdar olmuşdur. Bu fikirlər konkret rəqəmlər, misallar və faktlarla təsdiqlənmişdir. Səhnədəki ekranda nümayiş etdirilən rəqəmlər, diaqramlar, sxemlər, fotoşəkillər və digər məlumatlar Sumqayıt müəllimlərinin böyük uğurlarına əyani sübut idi.

V.Bağırov şəhərin orta təhsil müəssisələrinin maddi-texniki bazasının möhkəmləndirilməsi üçün görülmüş tədbirlər nəticəsində təhsil göstəricilərinin yaxşılaşdığını qeyd edərək vurğulamışdır ki, son 8 ildə şəhərdə 4 orta məktəb istifadəyə verilmiş, 7 məktəb üçün yeni tədris korpusu tikilmiş, uşaq və yeniyetmələrin yaradıcılıq mərkəzi və şahmat məktəbi təmir edilmiş, 3 mindən çox parta və digər məktəb avadanlığı alınmışdır. Yeni dərs ilində şəhər məktəblərində müvafiq mebel və reaktivlərlə təchiz olunmuş 19 fizika və kimya laboratoriyası yaradılmışdır. Dövlətimizin başçısı İlham Əliyevin tələblərinə uyğun olaraq şəhərin orta tədris müəssisələrinin informasiya-telekommunikasiya texnologiyaları ilə təchizatı xeyli yaxşılaşmışdır. Sumqayıtda İnformasiya Texnologiyaları Akademiyası yaradılmışdır. 2008-ci ildən başlayaraq burada gənc kompüter mütəxəssislərinin müsabiqəsi keçirilir. Müsabiqənin coğrafiyası xeyli genişlənmişdir. Bu il Sumqayıtda informasiya-telekommunikasiya texnologiyalarına həsr edilmiş respublika konfransı keçirilmişdir.

Məruzəçi daha sonra qeyd etmişdir ki, ötən dərs ilində 9-cu sinif məzunlarının 96,1 faizi və 11-ci sinif məzunlarının 95,2 faizi təhsili uğurla başa vuraraq müvafiq sənədlər almışlar. Respublikanın ali məktəblərinə qəbul imtahanlarının nəticələri xüsusi qürur hissi ilə elan edilmişdir. Belə ki, bu il ölkənin ali məktəblərinə daxil olmuş 1330 sumqayıtlı tələbədən 109-u 600-dən çox bal, 36-sı isə 650-dən çox bal toplamışdır.

Vidadi Bağırov qeyd etmişdir ki, təhsilin uğurlu olmasını təmin edən əsas amil müəllimdir. Sevindirici haldır ki, ötən tədris ilində Sumqayıt müəllimlərinin əməyi dövlətimiz tərəfindən yüksək qiymətləndirilmişdir. Sumqayıtlı müəllimlərdən 1 nəfəri "Şöhrət" ordeni, 6 nəfəri "Tərəqqi" medalı ilə təltif edilmiş, 5 nəfərə "Azərbaycan Respublikasının əməkdar müəllimi" fəxri adı verilmiş, 4 nəfərə Təhsil Nazirliyinin Fəxri fərmanı təqdim edilmiş, sumqayıtlı müəllimlərdən 10 nəfəri "Ən yaxşı müəllim" müsabiqəsinin qalibi olmuşdur.

Şəhərdə təhsilin keyfiyyətinə diqqətin artırılması ilə yanaşı, şagirdlərin estetik tərbiyəsi, onların yaradıcı qabiliyyətlərinin inkişaf etdirilməsi üçün maksimum şərait yaradılmışdır. "Qanadlandıq uçmağa" adlı illik poeziya almanaxının nəşri də bu məqsədə xidmət edir. Almanaxın 11-ci buraxılışında 30-a yaxın Sumqayıt məktəblisinin şeirləri dərc edilmişdir. "Bənzərsiz ömür" almanaxında Sumqayıt məktəblərinin yuxarı sinif şagirdlərinin ümummilli lider Heydər Əliyevin anadan olmasının 87-ci ildönümünə həsr edilmiş ən yaxşı inşaları toplanmışdır.

Ənənəyə görə, bu yay mövsümündə də imkansız ailələrdən olan şagirdlər üçün yay düşərgələri təşkil edilmişdir. Burada uşaqların fəal və səmərəli istirahəti üçün hər cür şərait yaradılmışdır. Düşərgələrdə dincələn uşaqlara yüngül səhər yeməyi verilirdi. Yay tətili günləri bu uşaqların yaddaşında ölkə regionlarına maraqlı səfərlər və ekskursiyalarla qalacaqdır.

Konfransda çıxış edən təhsil işçiləri, valideynlər, eləcə də 1-ci kurs tələbələri qazanılmış uğurları vurğulamış, təhsilin səviyyəsinin yaxşılaşdırılmasına və onun modernləşməsinə daim qayğı göstərən dövlətimizin başçısı İlham Əliyevə təşəkkür etmişlər.

Respublikanın təhsil naziri Misir Mərdanov və Sumqayıt Şəhər İcra Hakimiyyətinin başçısı Vaqif Əliyev konfransda çıxış etmişlər. Onlar qeyd etmişlər ki, ümummilli lider Heydər Əliyevin respublikada təhsil sisteminin inkişafına dair uzaqgörən və məqsədyönlü strategiyası pozitiv nəticələr verir. Respublikamızın rəhbəri İlham Əliyevin dövlətimizin qüdrətini artırmağa, vətəndaşların maddi rifahını yaxşılaşdırmağa yönəlmiş fəaliyyəti razılıq hissi ilə qeyd edilmişdir. Vurğulanmışdır ki, iqtisadiyyatda qazanılan uğurlar təhsil sahəsinə də müsbət təsir göstərir. Qısa vaxt ərzində çoxlu mühüm layihələr həyata keçirmiş Heydər Əliyev Fondu və onun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva barəsində də xoş sözlər deyilmişdir.

Misir Mərdanov və Vaqif Əliyev şəhər təhsil şöbəsinin işini yüksək qiymətləndirərək bir sıra maraqlı təkliflər söyləmiş, müvafiq tövsiyələr vermişlər. Təhsil prosesində əsas sima olan pedaqoqun rolu da qeyd edilmişdir. Natiqlər cəmiyyətdə müəllimin nüfuzunun bərpa edilməsi, onun statusunun möhkəmləndirilməsi kimi aktual məsələlərə də toxunmuşlar. Çıxışlarda dönə-dönə vurğulanmışdır ki, ümumtəhsil məktəbinin başlıca missiyası şagirdləri əsl şəxsiyyət kimi formalaşdırmaq, onları cəmiyyətin layiqli üzvləri olacaq vətəndaşlar kimi tərbiyə etməkdir.

Konfransda "Ən yaxşı müəllim" müsabiqəsinin qalibləri olmuş müəllimlərə, qəbul imtahanlarında 650-dən çox bal toplamış 1-ci kurs tələbələrinə və "Ən yaxşı ümumtəhsil məktəbi" müsabiqəsində fərqlənmiş 3 məktəbə mükafatlar təqdim edilmişdir.  

AzərTAc