Oktyabrın 15-də Azərbaycan Respublikasının
təhsil naziri Misir Mərdanov Bakının Biləcəri
qəsəbəsində yerləşən 299 nömrəli məktəbdə olub,
bu tədris ocağının Valideyn-Müəllim
Assosiasiyasının üzvləri ilə görüşüb.
Görüşdən öncə nazir məktəbi gəzərək burada
şagirdlərin təhsili, müəllimlərin fəaliyyəti
üçün yaradılan şəraitlə tanış oldu. Məktəbin
direktoru Solmaz Kazımova tədris ocağı barədə
nazirə məlumat verdi. Bildirildi ki, 1943-cü
ildə açılmış, 2008-ci ildən fəaliyyətini
məktəb-lisey kimi davam etdirən tədris ocağında
hazırda 1570 şagird təhsil alır. 121 müəllim
onların təlimi, tərbiyəsi, həyata hazırlanması
ilə məşğuldur. Məktəb binasının kiçikliyi,
qəsəbənin mərkəzində yerləşdiyi üçün bura uşaq
axınının çox olması üzündən yaranmış sıxlıq və
darısqallıq nəzərə alınaraq 2006 və 2008-ci
illərdə dövlət vəsaiti hesabına məktəb üçün
əlavə korpuslar tikilərək istifadəyə verilib.
Əsas korpus özü də 2008-ci ildə əsaslı təmir
olunub.
Məktəbdəki sinif otaqları, laboratoriyalar
müasir avadanlıqlarla təchiz edilib. Məktəbə 68
kompüter dəsti verilib. 4 kompüter sinfi
yaradılıb, bütün kompüterlər İnternet şəbəkəsinə
qoşulub. Bu işlərdə 2008-ci ildə təsis olunmuş
VMA üzvlərinin, qəsəbə bələdiyyəsinin yaxından
köməyi olduğu qeyd edildi.
Təhsil naziri məktəbin əsas və əlavə tədris
korpuslarını, həyətyanı sahəsini gəzib
siniflərə, fənn kabinetlərinə, laboratoriyalara,
kompüter otaqlarına baxdı, idman zalı,
kitabxana ilə tanış oldu.
Sonra təhsil naziri məktəbin akt zalında VMA
üzvləri ilə görüşdü. Görüşü açan Misir Mərdanov
zala toplaşanları salamlayaraq bir neçə ay öncə
VMA nümayəndələri ilə Təhsil Nazirliyindəki
görüşündə verdiyi sözə əməl edərək onlarla
görüşə gəldiyini söylədi. Məktəbdən aldığı
təəssüratını görüş iştirakçıları ilə bölüşən
nazir aparılan tikinti-təmir işlərini yüksək
qiymətləndirdi, tədris ocağında normal şəraitin
yarandığını söylədi, bu mühitin yaranmasında
əməyi olanlara təşəkkürünü bildirdi.
Son 7-8 il ərzində ölkəmizdə 2 mindən artıq
məktəbin şəraiti yaxşılaşdırılsa da hazırda,
təxminən bir o qədər də məktəbdə vəziyyətin pis
olduğunu, təkcə Bakıda 160 məktəbin əsaslı
təmirə, əlavə tədris korpusuna ehtiyacı olduğunu
deyən nazir artıq bu istiqamətdə sistemli işlər
aparıldığını diqqətə çatdırdı.
299 nömrəli məktəb-liseydə bu baxımdan vəziyyəti
qənaətbəxş saydığını söyləyən nazir mövcud
vəziyyəti qoruyub saxlamağı, təlimin
keyfiyyətini yaxşılaşdırmağı, məktəbdə sağlam
mühit formalaşdırmağı, valideynləri məktəbin
idarə olunmasına yaxından cəlb etməyi kollektivə
tövsiyə etdi. Nazir bildirdi ki, ona verilən
məlumata görə, bu təhsil ocağında VMA öz
fəaliyyətini çox yaxşı qurub, valideynlərlə
məktəb, müəllimlər arasında sıx əlaqə mövcuddur,
valideynlər məktəbin problemlərinin həllində
fəal iştirak edirlər. Buna sevindiyini deyən
nazir digər məktəblərdə də belə olmasını arzu
etdi.
Yaradılmış yaxşı şəraitə baxmayaraq, məktəbin
bir sıra problemlərinin də olduğunu qeyd edən
nazir onların aradan qaldırılmasında təhsil
ocağına nazirlik tərəfindən lazımi köməklik
göstəriləcəyinə kollektivi əmin etdi.
Görüşdə VMA üzvü olan müəllim və valideynlərdən
Nuriyyə Verdiyeva, Nadir Ağayev, İlham
Qayıbzadə, məktəb VMA-nın prezidenti Mübariz
Kərimov çıxış edib, işinin çox olmasına
baxmayaraq vaxt ayırıb onlarla görüşə gəldiyinə
görə nazirə təşəkkürlərini bildirdilər, arzu və
təkliflərini söylədilər.
Görüşün sonunda təhsil naziri çıxış edənlərə
təşəkkürünü bildirib toxunulan bir sıra
məsələlərin onu da düşündürdüyünü, yaxın
gələcəkdə onların həlli istiqamətində zəruri
addımlar atılacağını, söylənən irad və
təkliflərə diqqətlə yanaşılacağını bildirdi.
Yusif ƏLİYEV |