Son illər təhsilimizə göstərilən diqqət və qayğı
güclü inkişafa yol açmışdır. Təhsilin hər bir
sahəsində faydalı islahatlar aparılır, uğurlu
nailiyyətlər əldə olunur.
Ölkəmizdə
təhsil sahəsində atılan yeni addımlardan biri də
kurikulumların hazırlanması və tətbiqidir.
Bununla əlaqədar kurikulumlarla işləyən
müəllimlər üçün tez-tez təlim kursları
keçirilir. Mən də digər həmkarlarım kimi həmin
təlim kurslarının iştirakçısı olmuşam. 2007-ci
ilin iyununda Azərbaycan Respublikası Təhsil
Nazirliyi və "Mədəd" humanitar təşkilatı
tərəfindən təşkil edilmiş İKT-nin təhsildə
tətbiqi üzrə müəllimlərin peşəkarlıq
səviyyəsinin təkmilləşdirilməsi təlim kursunda,
2008-ci ilin aprelində keçirilən Azərbaycan
Respublikasının tədris standartlarına müvafiq
olaraq informasiya texnologiyalarının tədris
prosesində səmərəli istifadəsi üzrə
"İntel-gələcək üçün təhsil" kursunu, 2010-cu
ilin avqustunda keçirilən "Yeni ibtidai təhsil
kurikulumu üzrə müəllimlərin təlim Proqramı"
kursunun fəal iştirakçısı olmuş və sertifikatlar
almışam. İştirak etdiyim təlim kurslarından
faydalanaraq və öyrəndiyim yenilikləri
fəaliyyətimdə tətbiq edirəm.
Dərs planını qurduqda, ilk növbədə, şagirdlərin
bilik və bacarıq səviyyəsini, onların idrak
qabiliyyətini nəzərə alıram. Planlaşdırmada
dərsin məqsədini və tədqiqat sualının gedişini
ardıcıllıqla qeyd edir, müzakirə üçün suallar
tərtib edirəm. Suallar yeni faktlar əsasında
bilikləri sistemləşdirir və tədqiqat sualını
aydınlaşdırmaqla başlıca əlaqəni üzə çıxarmağa
kömək edir.Tərtib etdiyim suallar şagirdləri
müqayisə, təhlil və sintezə yönəldir, onlara
tədqiqat sualına cavab tapmaqda istiqamət verir.
Düşündürücü suallar şagirdlərin məntiqi,
tənqidi, yaradıcı təfəkkürünü və elmi-tədqiqat
vərdişlərini inkişaf etdirir. Bu istiqamətdə
apardığım dərslər şagirdlərin şəxsiyyət yönümlü
bir fərd kimi formalaşmasına zəmin yaradır.
Onların həyati bacarıqlarını üzə çıxarır.
Şagirdlərimdə məntiqi və yaradıcı təfəkkürün
inkişaf etdiyini gördükdə məndə böyük fərəh
hissi oyanır və qürur duyuram. Öz müəllimlik
peşəmlə vətənimə gərəkli, istedadlı, vətənpərvər
övladlar yetişdirməklə fəxr edirəm.
İradə ƏLİYEVA
Bakı şəhərindəki E.Məmmədov
adına 189 nömrəli orta məktəbin
ibtidai sinif müəllimi |