Naxçıvan Dövlət Universitetində Yeni Azərbaycan Partiyası Universitet şəhərciyi ərazi ilk təşkilatının elmi konfransı keçirildi.

Konfransı giriş sözü ilə açan rektor, akademik İsa Həbibbəyli Yeni Azərbaycan Partiyasının milli inkişaf və tərəqqi partiyası, xalqın rifah mənbəyi olduğunu vurğuladı. Qeyd olundu ki,ümummilli lider Heydər Əliyev tərəfindən yaradılan, onun müdrik siyasəti altında xalqı, eləcə də onun intellektual potensialını öz ətrafında birləşdirən, siyasi gücə malik olan bu partiya dünya miqyasında da böyük nüfuz qazanmışdır. Natiq Yeni Azərbaycan Partiyasının iqtidara gəldikdən sonra elmin, təhsilin inkişafı istiqamətində gördüyü mühüm işlərdən, Azərbaycan Respublikasının Prezidenti İlham Əliyevin daxili və xarici siyasətinin uğurlarından danışdı.

YAP Universitet şəhərciyi ərazi ilk təşkilatının sədri, Azərbaycan Respublikasının əməkdar müəllimi, pedaqoji elmlər namizədi, dosent Kamal Camalov "Yeni dərs ilində Yeni Azərbaycan Partiyasına üzv olan tələbə gənclərin vəzifələri" mövzusunda məruzə etdi.

Məruzəçi partiyanın gəncliyə yüksək etimad göstərdiyini, müstəqil, demokratik, hüquqi dövlət quruculuğunda onların daim irəli çəkildiyini bildirdi. 1992-ci ilin dekabr ayından fəaliyyətə başlayan YAP Universitet şəhərciyi ərazi ilk təşkilatı 2000-ə yaxın üzvü öz sıralarında birləşdirərək ölkənin ictimai-siyasi həyatında yaxından iştirak edir. Ümumxalq mənafeyinin qorunması, dövlət müstəqilliyinin möhkəmləndirilməsi uğrunda fəal mübarizə aparan partiyanın nizamnamə və proqramı ziyalı gənclik tərəfindən yekdilliklə dəstəklənir. Natiq Yeni Azərbaycan Partiyasının qarşıdan gələn parlament seçkilərində gəncliyə və elmi potensiala böyük üstünlük verdiyini nəzərə çatdırdı, universitet kollektivini seçkilərdə mütəşəkkil şəkildə iştirak edərək layiqli namizədə səs verməyə çağırdı.

Tədbirin sonunda partiya sıralarına qəbul edilmiş üzvlərə vəsiqələr təqdim olundu.

Mehriban SULTAN