Gəncə Dövlət Universitetində təhsilin şəffaflığını təmin etmək məqsədilə auditoriyalarda veb-kameralar quraşdırılmışdır. Respublikamızda analoqu olmayan bu sistemin tətbiqi hər kəsə imkan verir ki, istənilən vaxt kompüterdə İnternet koduna daxil olmaqla istədiyi auditoriyada keçilən mühazirələri izləyə bilsin. Bundan başqa, keçilən dərslərin görüntüsü arxivdə saxlanılır ki, bunun da nəticəsində hər bir imtahanı gələcəkdə izləmək mümkün olacaqdır.

Onu da qeyd etmək lazımdır ki, tələbələr imtahanları yeni sistemlə verəcəklər. Belə ki, tələbə imtahan zamanı kompüter qarşısında əyləşərək verilən 50 sualı cavablandırdıqdan sonra onun semestr boyu dərsə davamiyyəti və keçilən dərs zamanı sual-cavabdakı iştirakına da diqqət yetiriləcəkdir.

Universitetin rektoru Elman Məmmədovun verdiyi məlumata görə, belə bir sistemin tətbiqi həm müəllimlərdə, həm də tələbələrdə məsuliyyət hissini artırmaqla bərabər şəffaflığı da təmin edir. Yeni sistemin bir üstünlüyü də ondadır ki, valideynlər imtahanların gedişi zamanı və yaxud sonralar imtahan vaxtı övladlarının verdikləri cavabları dinləmək imkanı qazanacaqlar.  

AzərTAc