Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın dəvəti ilə ölkəmizdə səfərdə olan Türkiyə Respublikasının enerji və təbii sərvətlər, səhiyyə, daxili işlər, xarici ticarət, gömrük nazirliklərinin və digər aparıcı dövlət qurumlarının nümayəndələri noyabrın 29-da Azərbaycan Respublikasının Prezidenti yanında Dövlət İdarəçilik Akademiyasında keçirilən "dəyirmi masa"da iştirak etmişlər.

Tədbirdən öncə qonaqlar DİA-nın elmi kitabxanası, informasiya texnologiyaları, geostrateji araşdırmalar mərkəzləri ilə, həmçinin akademiyanın professor-müəllim heyətinin elmi əsərlərindən ibarət sərgi ilə tanış olmuşlar.

"Dəyirmi masa"nı giriş sözü ilə açan akademiyanın birinci prorektoru, professor Əlikram Abdullayev Türkiyə-Azərbaycan münasibətlərinin inkişafından, dövlət qulluğu sahəsində hər iki ölkənin həyata keçirdiyi islahatlardan söz açmışdır. Natiq dövlət qulluqçularının yetişdirilməsi istiqamətində Dövlət İdarəçilik Akademiyasının Türkiyə və Orta Şərq Dövlət İdarəçiliyi İnstitutunun əməkdaşlığından bəhs etmiş, DİA-nın fəaliyyətini əks etdirən geniş təqdimatla çıxış etmişdir.

Dövlət qulluğu ilə bağlı problemlərin müzakirəsinə həsr edilmiş tədbirdə Türkiyə və Orta Şərq Dövlət İdarəçiliyi İnstitutunun prorektoru, professor Kamil Ufuq Bilgin çıxış edərək əməkdaşlığın davam etdirilməsinin əhəmiyyətindən danışmış, görüşün səmərəli keçdiyini qeyd etmişdir.

"Dəyirmi masa"ya qatılan DİA-nın professor-müəllim heyəti fikir mübadiləsində iştirak etmişdir.