Prezident Dmitri Medvedev "Təhsil haqqında"
Qanun layihəsinin ictimai müzakirəyə
çıxarılmasını təklif edib
Rusiya
Federasiyasının Prezidenti Dmitri Medvedevin
ölkənin təhsil və elm naziri Andrey Fursenko ilə
bu günlərdə keçirilən işgüzar görüşündə "Təhsil
haqqında" Qanun layihəsinin ictimai müzakirəyə
çıxarılması məsələsi müzakirə olunub. Prezident
qeyd edib ki, Rusiya Federasiyasının "Təhsil
haqqında" yeni Qanun layihəsinin ictimai
müzakirəsi "Polis haqqında" Qanun layihəsinin bu
yaxınlarda keçirilmiş müzakirəsindən heç də az
maraqlı olmayacaq. Dmitri Medvedev qeyd edib ki,
Rusiya vətəndaşlarının müasir təhsil - XXI əsrin
təhsili haqqında təsəvvürlərini əks etdirəcək
optimal, balanslaşdırılmış bir sənəd hazırlamaq
lazımdır.
Müəllimləri təbrik edərkən onların "Təhsil
haqqında" Qanunun kütləvi müzakirəsini təşkil
etmək barədə təkliflə Prezidentə müracət
etdiyini deyən D.Medvedev bu prosesə başlamaq
üçün hazırda real imkan yarandığını bildirib və
bu işə hazırlığın necə getməsi, müzakirə
nəticəsində nə alınması ehtimal olunduğu ilə
maraqlanıb.
Dövlət başçısına məlumat verilib ki, Sizin
göstərişinizə uyğun olaraq Prezidentin müşaviri
Veniamin Fyodoroviç Yakovlevın rəhbərliyi
altında komissiya yaradılıb. Komissiyaya həm
İctimai Palatanın, həm də müxtəlif təhsil
səviyyələrinin nümayəndələri, o cümlədən ölkənin
aparıcı ali məktəblərinin rektorları daxil
edilib. Komissiya müzakirənin necə təşkil
olunmasını təklif edib. Eyni zamanda ilk təklif
olunan materialların redaktəsi aparılıb və onlar
sayta yerləşdirilmək üçün hazırlanıb.
Prezident bildirib ki, "Polis haqqında" Qanunun
ictimai müzakirəsində olduğu kimi təhsil
haqqında qanun layihəsinə də maraq çox olacaq və
təkliflər veriləcək. O, veriləcək təkliflərə
diqqətlə yanaşılmasını, onların toplanıb təhlil
edilməsini tövsiyə edib.
Təhsilin inkişafının yeni proqramı müzakirə
olunub
Rusiya Federasiyasının Baş naziri Vladimir
Putinin Rusiya Federasiyası təhsil və elm naziri
Andrey Fursenko ilə işgüzar görüşündə təhsilin
inkişafı üzrə yeni məqsədli Federal Proqramın
əsas istiqamətləri müzakirə olunub. Görüşdə qeyd
edilib ki, Rusiya Federasiyasının təhsilin
inkişafı üzrə mövcud proqramının fəaliyyət
müddəti bu il başa çatır. Bununla əlaqədar
Rusiya Federasiyasının Təhsil və Elm Nazirliyi
bu mövzuda yeni sənəd hazırlamışdır. Baş nazirə
məlumat verilib ki, yeni proqramın ideoloji
əsasını Milli layihənin regionlarda təhsilin
kompleks inkişafına həsr olunan hissəsi təşkil
edir. Yeni məqsədli federal proqramda
regionlarda təkmilləşdirmə mərkəzlərinin - ən
yaxşı məktəbəqədər təhsil verən mərkəzlərin, ən
yaxşı məktəblərin, ibtidai və orta peşə təhsili
sahəsində çalışan kadrların, o cümlədən yaşlı
insanların yenidənhazırlanması mərkəzlərinin
yaradılması ideyası öz əksini tapıb.
Proqramda təhsilin keyfiyyətinin
qiymətləndirilməsi sahəsində dövlət
qiymətləndirilməsindən ictimai qiymətləndirməyə
keçid nəzərdə tutulub. Məktəbəqədər
müəssisələrin, məktəblərin idarə olunmasına
idarəetmə şuralarının , valideynlərin cəlb
olunması zəruri hesab olunur. Peşə təhsili
müəssisələrində bu işi peşə assosiasiyaları,
işəgötürənlər görə bilərlər. Kimlərin və necə
hazırlanmasına məhz onlar qiymət verə bilərlər.
Yusif ƏLİYEV |