|
Dekabrın 5-də ölkənin bütün şəhər və
rayonlarında məktəblilərin ənənəvi fənn
olimpiadalarının rayon (şəhər) mərhələsinin
birinci turu keçirildi.
Bakı Şəhəri üzrə Təhsil İdarəsindən aldığımız
məlumata görə, paytaxtda keçirilən bilik
yarışında 310 məktəbdən 7400 şagird iştirak
edib. Ümumilikdə 13 məntəqədə təşkil olunan
olimpiadada VII-XI sinif şagirdləri 9 fənn -
Azərbaycan dili və ədəbiyyat, Azərbaycan tarixi,
fizika, kimya, biologiya, riyaziyyat,
informatika, coğrafiya və xarici dil üzrə
biliklərini sınayıblar. Qeyd edək ki, ilk turun
nəticələrinin yoxlanılması yaxın günlərdə başa
çatacaq.
Bu turun qalibləri gələn il yanvarın 9-da
keçiriləcək ikinci turda iştirak edəcəklər.
***
Azərbaycan Respublikası təhsil nazirinin müvafiq
əmrinə uyğun olaraq məktəblilərin fənn
olimpiadalarının rayon (şəhər) mərhələsinin I
turu dekabrın 5-də Qusar rayonunda da yüksək
səviyyədə keçirilib. Qusar RTŞ-dan aldığımız
məlumatda bildirilir ki, şəhərin 6 nömrəli orta
məktəbində təşkil olunan fənn olimpiadalarında
rayonun 431 nəfər VII-XI sinif şagirdi iştirak
edib. Azərbaycan dili və ədəbiyyatdan 80,
riyaziyyatdan 97, Azərbaycan tarixindən 41, rus
dili və ədəbiyyatdan 34, fizikadan 37, kimyadan
25, biologiyadan 39, coğrafiya 37, xarici dil 33
və informatikadan 8 nəfər şagird biliyini
nümayiş etdirib. Şagirdlərin cavabları komissiya
tərəfindən dərhal yoxlanılaraq fənn
olimpiadasının I turunun qalibləri müəyyən
olunub.
Olimpiadada şəhər 1, 2, 3 və 6 nömrəli tam orta,
Həzrə, Balaqusar, Yasab, Piral kənd
məktəblərinin şagirdləri xüsusi
fərqləniblər.
***
Respublikamızın bütün ümumtəhsil məktəblərində
olduğu kimi, Lənkəranda da fənn olimpiadalarının
rayon (şəhər) turu keçirilib. Lənkəran ŞTŞ-dan
verilən məlumatda bildirilir ki, olimpiadanın
yüksək səviyyədə keçirilməsi üçün hər cür şərait
yaradılıb. Həmin gün Azərbaycan dili və
ədəbiyyat, Azərbaycan tarixi, xarici dil,
coğrafiya fənləri üzrə şəhər 1 nömrəli, fizika,
riyaziyyat, kimya, biologiya və informatika
fənləri üzrə isə şəhər 4 nömrəli məktəblərdə
keçirilmiş bilik yarışlarında VII-XI sinif
şagirdləri öz intellektual səviyyələrini nümayiş
etdiriblər.
Fənn olimpiadalarında rayonun ümumtəhsil
məktəblərinin 1064 şagirdi iştirak edib.
Artıq II turda iştirak edəcək şagirdlərin adları
məlum olmuşdur.
Rəşad ZİYADOV,
Ədalət DAŞDƏMİRLİ |
