BDU-nun rektoru, akademik Abel Məhərrəmovun
imzaladığı əmrə əsasən, Bakı Dövlət
Universitetinin əyani şöbəsində qış imtahan
sessiyası başlayıb. Yanvarın 31-də başa çatacaq
imtahanlar 3 növbəli olacaq və bütün fakültələr
üzrə elektron və alternativ test, o cümlədən
monitorinq üsulu ilə həyata keçiriləcək.
İmtahan
başlamazdan öncə fakültə dekanları, koordinator
və rəhbər koordinatorların iştirakı ilə rektorun
görüşü keçirilib. Akademik Abel Məhərrəmov qış
imtahan sessiyası haqqında danışıb, dekanları,
koordinator və rəhbər koordinatorları prosesə
ciddi nəzarət etməyə, tələbələrin biliyini
obyektiv qiymətləndirməyə çağırıb. Rektor
bildirib ki, tələbələrə daha ciddi nəzarət
etmək, köçürmə hallarının qarşısını almaq üçün
bütün auditoriyalarda kameralar quraşdırılıb. Bu
işlərə Elektron Tədris Mərkəzi nəzarət edəcək.
Rektor mərkəz haqqında danışaraq bildirib ki,
qurum BDU-nun 2006-cı ildən etibarən Boloniya
prosesinə qoşulması ilə əlaqədar bu prosesin
prinsiplərinin həyata keçirilməsinə,
universitetdə bakalavriat və magistratura
pillələri üzrə tədris prosesinin gedişinə, eyni
zamanda imtahan sessiyasının mütəşəkkil
keçirilməsinə nəzarət etmək məqsədilə yaradılıb.
Daha sonra çıxış edən tədris işləri üzrə
prorektor, professor Vüsət Əfəndiyev bugünkü
imtahanların 5 fakültə, 38 auditoriyada
aparılacağını bildirib. Prorektor məlumat
verərək bildirib ki, monitorinq imtahanlarına 3,
testlə keçiriləcək imtahanlara isə 2 saat vaxt
veriləcək. Tələbələr qiymətlərini növbəti gün
saat 13.00-da dekanlıqlardan öyrənə biləcəklər.
İmtahanlara nəzarət edəcək müəllimlərin bölgüsü
başa çatdıqdan sonra rektor imtahan keçirilən
auditoriyalarda olub. Fizika fakültəsinin
diferensial tənliklər, riyazi-fizika üsulları,
praktik astrofizika, biologiya fakültəsinin isə
torpaq eroziyası, entimologiya, fəlsəfə,
onurğalılar zoologiyası və mərkəzi sinir sistemi
fənlərindən imtahan verən II, III və IV kurs
tələbələri ilə söhbət edib, sualların keçirilmiş
mühazirə mətnlərinə uyğun olub-olmaması ilə
maraqlanıb.
Tələbələrə uğurlar arzulayan rektor onları
biliklərinin obyektiv qiymətləndiriləcəyinə əmin
edib.
BDU-nun Mətbuat və informasiya şöbəsi
|
|