NDU-nun Elmi Kitabxanasında universitetin
Memarlıq kafedrasının müdiri, memarlıq namizədi
Qadir Əliyevin "Memar Əcəmi Naxçıvani
yaradıcılığında ahəngdarlıq" kitabının təqdimatı
keçirildi. Xatırladaq ki, 2007-ci ildə
Azərbaycan dilində nəşr olunan, Ukraynada yenicə
işıq üzü görmüş kitab rusdilli elmi ictimaiyyət
tərəfindən də böyük maraqla qarşılanmışdır.
Sevastopol Milli Universitetinin professoru,
tarix elmləri doktoru D.Q.Sidorukun rəyi ilə çap
olunan nəşr Ukraynada da tədris vəsaiti kimi
geniş yayılmışdır.
Təqdimat
mərasimini giriş sözü ilə akademik, rektor İsa
Həbibbəyli açaraq universitet kitabxanasında
yeni elmi, kütləvi və bədii nəşrlərin təbliği
istiqamətində görülən təqdirəlayiq işlərdən
danışdı. Qadir Əliyevin elmi-pedaqoji
fəaliyyətindən söz açan natiq yeni nəşri
Azərbaycan memarşünaslıq elminin ən yüksək
nailiyyətlərindən biri kimi dəyərləndirdi.
Millət vəkili qeyd etdi ki, əsər
Azərbaycan-Ukrayna elmi əlaqələrinin inkişafı,
Azərbaycanın ayrılmaz parçası olan Naxçıvanın
qədim tarixinin, şəhərsalma mədəniyyətinin,
milli mənəviyyatımızın dünyada təsdiqi
baxımından da qiymətlidir.
Memarlıq kafedrasının baş müəllimi, memarlıq
elmləri üzrə fəlsəfə doktoru Gülnarə Qənbərova
kitabın Naxçıvanın nadir memarlıq abidələrinin
harmoniya və mütənasiblik problemlərinin
təhlili, həndəsi mütənasiblik prinsiplərinin
izahı, memarlıq formalarının, həndəsi fiqurların
qrafiki analizlərinin verilməsi baxımından
qiymətli elmi mənbə olduğunu bidirdi.
AMEA Naxçıvan Bölməsinin Tarix, Etnoqrafiya və
Arxeologiya İnstitutunun direktor müavini,
AMEA-nın müxbir üzvü Hacı Qadir Qədirzadə əsərdə
ilk dəfə olaraq Azərbaycan orta əsr memarlıq
nümunələrinin səlcuq-türk-İslam mədəniyyətinin
sintezi kimi tədqiqata cəlb olunduğunu,
yaradılışın fəlsəfəsinin, Əcəmi düşüncə tərzinin
açıldığını vurğuladı.
Azərbaycan-Qobustan radiosunun yaradıcısı Həbib
Əliyev Azərbaycan-Ukrayna elmi-ədəbi
əlaqələrinin inkişafından, mənfur ermənilərin
əsassız Naxçıvan iddialarını rədd etmək üçün bu
cür elmi nəşrlərin dünyada yayılmasının
əhəmiyyətindən danışdı.
Xarici tələbələrlə iş üzrə dekan, filologiya
elmləri üzrə fəlsəfə doktoru, dosent Xanəli
Kərimli müəllifi həmkarları adından təbrik
edərək kitabda həndəsi harmoniya ilə orta əsr
fəlsəfəsi və poeziyasının üzvi bağlılığı
haqqında da maraqlı nüanslara rast gəlindiyini
xatırlatdı.
Sonda müəllif tədbirin təşkilatçılarına
minnətdarlıq etdi. Ümummilli lider Heydər
Əliyevin Azərbaycan incəsənətinin inkişafındakı
xidmətlərindən danışan Qadir Əliyev gənclərə
tövsiyələrini çatdırdı. Müəllif kitabın
araya-ərsəyə gəlməsində akademik İsa
Həbibbəylinin, AMEA-nın müxbir üzvü Cəfər
Qiyasinin, mərhum memarşünas alimlər - Əbülfəz
Hüseyninin və Tağı Qasımoğlunun müstəsna rolunu
qeyd etdi.
Tədbirdə memarşünas alimin həyat və
fəaliyyətindən bəhs edən sərgi və slayd da
nümayiş etdirildi.
Mehriban SULTAN,
NDU-nun Mətbuat şöbəsinin müdiri |