Seyidov
Mirəsgər Mirabdulla oğlu
1970-ci il
fevralın 6-da Babək rayonunun Qaraxanbəyli
kəndində anadan olub.1987-ci ildə Naxçıvan şəhər
39 nömrəli orta məktəbi bitirib. Mirəsgər
1988-ci ildə sovet ordusu sıralarına hərbi
xidmətə çağırılıb. 1990-cı ildə hərbi xidmətini
başa çatdıraraq Naxçıvana qayıdıb. İşğalçı
erməni qoşunlarının Naxçıvana hücumu zamanı o da
könüllü olaraq özünümüdafiə batalyonunun
tərkibində vuruşub. Yağı düşmənə qarşı aparılan
uğurlu döyüş əməliyyatlarında, komandirləri
tərəfindən verilən mühüm döyüş tapşırıqlarının
bir bacarıqlı əsgər kimi dürüst yerinə
yetirilməsində xüsusi fəallıq göstərib. Mirəsgər
öz mehribanlığı, qayğıkeşliyi, vətənpərvərliyi
ilə döyüş yoldaşlarının, dostlarının dərin
hörmət və məhəbbətlərini qazanıb.
M.Seyidov
1992-ci il iyunun 14-də gərgin gedən döyüş
zamanı yoldaşlarını xilas edərkən ağır yaralanıb
və onun həyatını xilas etmək mümkün olmayıb.
Azərbaycan
Respublikası Prezidentinin 18 dekabr 1992-ci il
tarixli 367 nömrəli Fərmanı ilə Seyidov Mirəsgər
Mirabdulla oğlu ölümündən sonra Azərbaycanın
Milli Qəhrəmanı adına layiq görülüb.
Naxçıvan
şəhərində Şəhidlər xiyabanında dəfn olunub.
Təhsil aldığı Naxçıvan şəhər 39 nömrəli orta
məktəb onun adını daşıyır.
Seyidov
Məhərrəm Mirəziz oğlu
1952-ci il
sentyabrın 7-də Şərur rayonunun Alışar kəndində
anadan olub. 1969-cu ildə doğma kəndlərində orta
təhsilini başa çatdırıb və Xerson şəhərinə hərbi
xidmətə yollanıb. Məhərrəm əmək fəaliyyətinə
daxili işlər orqanlarında başlayıb. Bakı Xüsusi
Orta Milis Məktəbini bitirib və Şərur Rayon
Daxili İşlər Şöbəsində inspektor vəzifəsində
çalışıb. 1990-cı ildə erməni yaraqlılarının
Kərki kəndinə hücumunun qarşısını alanlardan
biri də Məhərrəm olub. Həmin vaxt orada
vəziyyətin son dərəcə gərgin olduğunu görən
M.Seyidov polis əməkdaşları ilə hadisə yerinə
yollanıb və yağı düşmənin geri çəkilməsinə nail
olub.
M.Seyidov
1990-cı ildə Sədərəyin müdafiəsi zamanı da
fəallıq göstərib. O, bu döyüşlər zamanı
yoldaşlarını güllə yağışı altında xilas edərkən
özü qəhrəmancasına həlak olub.
Ailəli idi.
Dörd övladı var.
Azərbaycan
Respublikası Prezidentinin 6 iyun 1992-ci il
tarixli 831 nömrəli Fərmanı ilə kapitan Seyidov
Məhərrəm Mirəziz oğlu ölümündən sonra
Azərbaycanın Milli Qəhrəmanı adına layiq
görülüb.
Şərur
rayonunda Şəhidlər xiyabanında dəfn olunub.
Ölümündən sonra "Qırmızı ulduz" ordeni ilə
təltif edilib. Şərur şəhərində adına küçə var,
tuncdan büstü qoyulub. Şərur şəhər 2 nömrəli
orta məktəb onun adını daşıyır.
Seryogin
Viktor Vasilyeviç
1944-cü il
martın 23-də Gürcüstan Respublikasının Tbilisi
şəhərində anadan olub. Orta təhsilini Tbilisi
şəhərində alıb. Viktor 1986-cı ildə Kremençuq
Mülki Aviasiya Məktəbini bitirdikdən sonra
Zabrat Əlahiddə Aviasiya dəstəsinə məxsus Mİ-2
vertolyotuna pilot təyin edilib. Azərbaycanda
hərbi aviasiyanın yaradılmasında onun da xüsusi
xidmətləri olub. Vertolyot heyəti tərkibində
Azərbaycan torpaqlarının müdafiəsi zamanı
verilən bütün tapşırıqları son dərəcə ustalıqla,
ləyaqətlə yerinə yetirən V. Seryogin 1992-ci il
yanvarın 28-də Şuşa - Ağdam marşrutu ilə
sərnişin apararkən erməni yaraqlılarının atəşinə
məruz qalıb. Viktor amansız ölümlə üz-üzə qalmış
şərnişinləri xilas etmək üçün alova bürünmüş
vertolyotu çətinliklə də olsa təhlükəsiz zonaya
yönəldə bilib. Beləliklə, itkinin qarşısı alınsa
da, Viktor özü heyət üzvləri ilə birlikdə
faciəli surətdə həlak olub.
Ailəli idi.
İki övladı var.
Azərbaycan
Respublikası Prezidentinin 25 noyabr 1992-ci il
tarixli 337 nömrəli Fərmanı ilə Seryogin Viktor
Vasilyeviç ölümündən sonra Azərbaycanın Milli
Qəhrəmanı adına layiq görülüb.
Bakı şəhərində
Şəhidlər xiyabanında dəfn olunub.
Slesaryov
Mixail Aleksandroviç
1955-ci il
mayın 8-də Rusiyanın Smolensk şəhərində anadan
olub. 1970-ci ildə Smolensk şəhər 4 nömrəli orta
məktəbin səkkizinci sinfini bitirdikdən sonra
təhsilini 19 nömrəli texniki peşə məktəbində
davam etdirib. 1971-ci ildə Smolensk Kənd
Təsərrüfatı Texnikası Birliyində traktorçu
işləməyə başlayıb. 1975-ci ildə sovet ordusu
sıralarına çağırılıb. 1977-ci ildə hərbi
xidmətini başa çatdıraraq göndərişlə Tbilisi
Gizirlər Məktəbinə daxil olub. Məktəbi
bitirdikdən sonra Bakıya gələn Mixail Slesaryov
1981-1986-cı illərdə motoatıcı tağımın
komandiri, 1986-1999-cu illərdə mühafizə
tağımının rəisi vəzifəsində işləyib. 1999-cu
ildə Qobustan həbsxanasında xidməti vəzifəsini
yerinə yetirərkən oradakı məhbuslar arasında
baş verən hadisə zamanı xüsusi qəhrəmanlıq
nümayiş etdirib və kiçik leytenant rütbəsi alıb.
M.Slesaryov
hazırda Azərbaycan Respublikası Ədliyyə
Nazirliyinin hərbi hissəsində tağım komandiri
vəzifəsində çalışır.
Ailəlidir.
Azərbaycan
Respublikası Prezidentinin 12 yanvar 1999-cu il
tarixli 73 nömrəli Fərmanı ilə Slesaryov Mixail
Aleksandroviç Azərbaycanın Milli Qəhrəmanı adına
layiq görülüb.
Şahbazov
Yavər Əlibala oğlu
1973-cü il
noyabrın 1-də Xaçmaz rayonunun Qıraqlı kəndində
anadan olub. 1991-ci ildə orta təhsilini rayonun
Alekseyevka kəndində "əla" qiymətlərlə başa
çatdıraraq elə həmin il Şamaxı Mədəni-Maarif
Texnikumuna daxil olub. Yavər 1994-cü ildə Milli
Ordu sıralarına hərbi xidmətə çağırılıb. O,
əsgəri borcunu yerinə yetirərkən öz
nizam-intizamı, nümunəvi xidməti ilə hamının
hörmətini qazanıb. Öz xidməti borcunu şətəflə,
ləyaqətlə yerinə yetirən Y.Şahbazov 1995-ci il
martın 13-də dövlət çevrilişinə cəhdin qarşısı
alınan zaman qiyamçıların atəşi altında olan
döyüş yoldaşlarını xilas edərkən qəhrəmancasına
həlak olub.
Azərbaycan
Respublikası Prezidentinin 4 aprel 1995-ci il
tarixli 307 nömrəli Fərmanı ilə Şahbazov Yavər
Əlibala oğlu ölümündən sonra Azərbaycanın Milli
Qəhrəmanı adına layiq görülüb.
Alekseyevka
kəndində dəfn olunub. Alekseyevka kənd orta
məktəbi onun adını daşıyır. Məktəbin önündə və
Xaçmaz şəhərində büstü qoyulub. 2003-cü ildə isə
Alekseyevka kəndində qəhrəmanın xatirəsinə
Şəhidlər abidəsi ucaldılıb.
Milli Qəhrəmanlar Beynəlxalq İnformasiya
Mərkəzinin materialları əsasında
hazırladı: Ədalət DAŞDƏMİRLİ |