Bakı Şəhəri üzrə Təhsil İdarəsinin 2 nömrəli
Uşaq-Gənclər Şahmat İdman Məktəbinin yetirmələri
bu ilin ilk günlərindən müxtəlif yaş qrupu üzrə
iştirak etdikləri yarışlarda uğurlu nəticələr
əldə ediblər.
Təsadüfi deyildir ki, yanvarın 11-dən 19-na kimi
Bakı Şəhər Gənclər və İdman Baş İdarəsinin
kütləvi idman tədbirləri planına əsasən 14 yaşlı
oğlanların və qızların arasında keçirilən Bakı
şəhər çempionatında 2 nömrəli UGŞİM-nin
yetirməsi Ramazan Süleymanlı fəxri IV yeri
tutaraq respublika birinciliyində iştirak etmək
üçün vəsiqəyə sahib olub. Eyni zamanda yanvarın
22-dən 30-na kimi 16 yaşlı oğlanların və
qızların arasında keçirilən Bakı şəhər
birinciliyində isə 2 nömrəli UGŞİM-nin yetirməsi
Məryəm Eyyubzadə şəxsi əmsala görə II yeri
tutaraq gümüş medala layiq görülüb və
respublika birinciliyində iştirak etmək hüququ
qazanıb. Həmçinin fevralın 14-dən 19-na kimi
Bakı Şəhər Gənclər və İdman Baş İdarəsinin
keçirdiyi Bakı şəhər komanda çempionatında da 2
nömrəli UGŞİM-nin yığma komandası II yeri
tutaraq kubok, medal və diplom ilə təltif olunub.
Martın 1-dən 10-na kimi 12 yaşlı oğlanlar və
qızlar arasında keçirilən Bakı şəhər
birinciliyində də 2 nömrəli UGŞİM-nin
yetirmələri Ayşən Əliyeva və İsmayıl Şahəliyev
bütün rəqiblərini geridə qoyaraq Bakı şəhər
çempionatının qalibləri olublar və respublika
birinciliyinə vəsiqə qazanıblar. Elə həmin
tarixdə müxtəlif yaş qrupundan olan oğlanlar və
qızlar arasında keçirilən 64 xanalı dama üzrə
Azərbaycan birinciliyində 2 nömrəli Uşaq-Gənclər
Şahmat İdman Məktəbinin yetirmələri 13 yaşlı
Faris Kərimzadə I yeri, 13 yaşlı Anar İsmayılov
III yeri və 10 yaşlı Fatimə Əfəndi III yeri
tutublar. Qaliblər kubok, diplom və qiymətli
hədiyyələrlə təltif ediliblər.
İnanırıq ki, şahmat məktəbinin yetirmələri
bundan sonra da respublika və beynəlxalq
yarışlarda uğurlar qazanacaq, Azərbaycan
şahmatının inkişafına yeni-yeni töhfələr bəxş
edəcəklər.
ƏDALƏT |