|
Aprelin 23-də Bakıdakı "Ləndmark" otelinin
"Rotunda" zalında uşaq və yeniyetmələrin
respublika elmi-texniki yaradıcılıq
müsabiqəsinin yekun sərgisi və qaliblərin
mükafatlandırılması mərasimi keçirildi.
 Tədbirdə
təhsil nazirinin müavini Elmar Qasımov, maliyyə
nazirinin müavini Azər Bayramov, Səbail Rayon
İcra Hakimiyyəti başçısının müavini Xalidə
Bayramova, Könüllü Hərbi Vətənpərvərlik Texniki
İdman Cəmiyyəti Respublika Şurasının sədri,
general-mayor Novruzəli Orucov, Azərbaycan
Texniki Universitetinin rektoru Havar Məmmədov
və KİV nümayəndələri iştirak edirdilər.
Mərasimi təhsil nazirinin müavini Elmar Qasımov
açaraq qonaqları və müsabiqə iştirakçılarını
salamladı. Nazir müavini bildirdi ki, texniki
yaradıcılığın 5 növü - aviamodel, kosmik raket
modeli, avtomodel, gəmi modeli, radiotexnika
uzrə 15 nominasiyada keçirilən müsabiqədə 8
yaşdan 18 yaşadək uşaq və yeniyetmələr iştirak
edib.
Qeyd olundu ki, 3 mərhələdə təşkil olunan
müsabiqənin I mərhələsi fevralda rayon və
şəhərlər üzrə , II mərhələsi fevral-mart
aylarında 9 zonada keçirilib. I,II,III yeri
tutan qaliblər zona mərhələsində iştirak etmək
hüququ qazanıblar. Müsabiqənin zona mərhələsində
respublikanın 65 rayonundan 300-ə yaxın məktəbli
iştirak edib. Respublika mərhələsində ölkənin 45
rayon və şəhərindən 185 məktəbli iştirak edib
ki, onlardan da münsiflər heyətinin qərarına
əsasən 45-i qalib hesab olunub.
Nazir müavini Elmar Qasımov ölkəmizdə təhsilin
bütün sahələrinin, o cümlədən məktəbdənkənar
təhsil müəssisələrinin inkişafına dövlət
tərəfindən göstərilən qayğıdan söz açaraq bu
istiqamətdə görülən işləri, həyata keçirilən
tədbirləri diqqətə çatdırdı. Müsabiqənin
keçirilməsində əsas məqsədin uşaq və
yeniyetmələrin elmi-texniki potensialının üzə
çıxarılması, onların yaradıcılığının inkişaf
etdirilməsi üçün stimulların yaradılması və
məktəblilər arasında təcrübə mübadiləsinin
aparılması olduğunu söyləyən Elmar Qasımov belə
tədbirlərin eyni zamanda ölkəmizdə neçə-neçə
istedadlı və bacarıqlı uşağın aşkarlanmasına
imkan və şərait yaratdığını bildirdi.
Çıxışının sonunda nazir müavini Elmar Qasımov
müsabiqənin keçirilməsində əməyi olanlara
təşəkkürünü bildirərək təhsil naziri Misir
Mərdanovun və öz adından qalibləri təbrik etdi,
onlara müvəffəqiyyətlər arzuladı.
Daha sonra Azərbaycan Texniki Universitetinin
rektoru Havar Məmmədov, Könüllü Hərbi
Vətənpərvərlik Texniki İdman Cəmiyyəti
Respublika Şurasının sədri, general-mayor
Novruzəli Orucov ölkəmizdə təhsilin uğurla
inkişaf etdiyini, onun yeniləşdiyini qeyd
edərək, keçirilən müsabiqənin əhəmiyyətindən söz
açdılar.
Sonra qaliblərə Təhsil Nazirliyinin diplomları
və hədiyyələr təqdim olundu.
Mükafatlandırma mərasimindən sonra qonaqlar
sərgidə nümayiş etdirilən məktəblilərin əl
işlərindən ibarət eksponatlarla tanış oldular.
Samirə KƏRİMOVA |
