|
 Naxçıvan
Dövlət Universitetinin rektoru, akademik İsa
Həbibbəyli Amerika Bioqrafiya İnstitutunun
akademiki seçilmişdir. İnstitutun prezidenti
cənab Evans tərəfindən imzalanan diplomda
yazılır: "Akademik İsa Həbibbəyli Amerika
Bioqrafiya İnstitutunun rəhbərliyi tərəfindən
çoxcəhətli fəaliyyəti araşdırılaraq cəmiyyətə
mühüm elmi və mədəni uğurlar təqdim etdiyinə,
elm sahəsində böyük nailiyyətlər qazandığına
görə görkəmli alim kim institutun akademiki
seçilmişdir".
Qeyd edək ki, Azərbaycan Respublikasının Milli
Məclisinin deputatı, tanınmış ictimaiyyətçi,
görkəmli elm xadimi, çoxsaylı elmi əsər və
məqalələrin müəllifi İsa Həbibbəyli səmərəli və
məhsuldar elmi fəaliyyətinə görə dünya elmi
ictimaiyyətində yetərincə tanınır. 2003-cü ildən
Azərbaycan Milli Elmlər Akademiyasının həqiqi
üzvü kimi fəaliyyət göstərən İsa Həbibbəyli
nüfuzlu beynəlxalq elmi təşkilat və qurumlarda
da milli təhsilimizi layiqincə təmsil
etməkdədir. Tanınmış alim 1999-cu ildə
Türkiyənin Atatürk Araşdırma Mərkəzi üzrə
Atatürk Kültür, Dil və Tarix Qurumunun müxbir
üzvü, 2001-ci ildə Nyu-York Elmlər
Akademiyasının, 2008-ci ildə isə Birləşmiş
Millətlər Təşkilatı nəzdində Beynəlxalq
İnformasiyalaşdırma Akademiyasının həqiqi üzvü
seçilmişdir.
Akademik İsa Həbibbəyli elmi nailiyyətlərinə
görə 2001-ci ildə ABŞ-ın Bioqrafiya İnstitutu
tərəfindən "İlin adamı" adına layiq görülmüş,
müxtəlif vaxtlarda BMT-nin nəzdində fəaliyyət
göstərən Beynəlxalq İnformasiyalaşdırma
Akademiyası tərəfindən "İnformasiya aləminin
elitası", "XIX-XX əsrlər Azərbaycan
ədəbiyyatının (Mirzə Cəlilin) və Azərbaycanda
müasir elmi-bədii fikrin inkişafı elmi
istiqamətinin rəhbəri" mükafatları və "Elmi
istiqamətin rəhbəri" medalı ilə təltif
olunmuşdur.
 İsa
Həbibbəylinin rektorluq fəaliyyəti, rəhbərlik və
təşkilatçılıq bacarığı nəticəsində Naxçıvan
Dövlət Universiteti son on beş ildə Azərbaycanda
elmin, təhsilin tərəqqisinə göstərilən yüksək
dövlət qayğısından bəhrələnərək hərtərəfli
inkişaf etmiş, müasir tipli bir universitet
kimi formalaşmış, ölkənin qabaqcıl ali
məktəblərindən birinə çevrilmişdir. Təsadüfi
deyil ki, dünya elm, təhsil sisteminə uğurla
inteqrasiya edən bu ali məktəb elm, təhsil və
yeni texnologiyaların tətbiqinin inkişafındakı
mühüm nailiyyətlərinə görə 2009-cu ildə
Beynəlxalq Sosial Əməkdaşlıq Korporasiyasının
"Minilliyin universiteti" adlı beynəlxalq
mükafatına layiq görülmüş, Asiya Universitetləri
Assosiasiyasının və Avropa Rektorlar Klubunun
üzvü seçilmişdir.
Görkəmli alim və ictimai xadim, maarifpərvər
ziyalı, gözəl insan, bacarıqlı təşkilatçı İsa
Həbibbəylini növbəti böyük uğuru - Amerika
Bioqrafiya İnstitutunun akademiki seçilməsi
münasibətilə kollektivimiz və xalqımız adından
ürəkdən təbrik edir, ona daha böyük nailiyyətlər
arzu edirik.
Mehriban SULTAN |
|
