|
Naxçıvan Dövlət Universitetinin beynəlxalq
münasibətlər və xarici dillər fakültəsində
Azərbaycan xalqının ümummilli lideri,
görkəmli dövlət xadimi Heydər Əliyevin
anadan olmasının 88-ci ildönümü münasibətilə
"Heydər Əliyev və Naxçıvan Muxtar Respublikası"
mövzusunda ingilis dilində I ümumuniversitet
bilik yarışması keçirilib. Yarışmada ali
məktəbin beynəlxalq münasibətlər və xarici
dillər, pedaqoji, sosial idarəetmə və hüquq,
iqtisad, incəsənət, tarix-filologiya,
fizika-riyaziyyat, tibb fakültələrinin hər
biri 5 nəfərdən ibarət olan komandaları
iştirak ediblər.
Yarışmadan əvvəl çıxış edən ali məktəbin
rektoru, akademik İsa Həbibbəyli belə
tədbirlərin tələbələrin dünyagörüşünün, ulu
öndərin zəngin irsi nümunəsində gələcək həyat və
fəaliyyətlərinin Vətən naminə yönləndirilməsində
yardımçı olacaq biliklərlə zənginləşdirmək
baxımından əhəmiyyətli olduğunu vurğulayıb,
komandalara uğurlar diləyib.
Beynəlxalq münasibətlər və xarici dillər
fakültəsinin dekanı, filologiya elmləri üzrə
fəlsəfə doktoru, dosent Qurban Qurbanlı
çıxış edərək burada məqsədin ümummilli
lider, görkəmli dövlət xadimi Heydər
Əliyevin həyat və fəaliyyətinə dair zəngin irsə
gənc nəslin daha dərindən yiyələnməsinə
köməklik göstərməkdən, gənc nəslə
azərbaycançılıq, dövlətçilik, vətənpərvərlik,
xalqın tarixi keçmişinə hörmət, ehtiram və
digər milli mənəvi dəyərlərlə bağlı
ideyaları aşılamaqdan ibarət olduğunu bildirib,
yarışmanın şərtləri haqqında məlumat verib.
Sonra yarışmaya start verilib. İKT tətbiqi
ilə təşkil olunan yarışma 2 mərhələdə
keçirilib. Komanda kapitanları və komanda
üzvləri haqqındakı məlumatlardan, verilmiş 2
dəqiqə ərzində mövzu ətrafındakı ev
tapşırıqlarından sonra başlanan yarışma
mərhələlərində komandaların cavabları 5
pilləli sistemlə (100-500 balla)
qiymətləndirilib. Hər mərhələdə suallar
çətinlik dərəcəsinə görə uyğun balla
qiymətləndirilib. Ümumilikdə 100 sual
təqdim olunub. Yarışmada iki komanda ilə
təmsil olunan beynəlxalq münasibətlər və
xarici dillər fakültəsinin komandaları
yüksək intellekt və hazırcavablıq nümayiş
etdirərək I və II yerlərdə, III yerdə isə
pedaqoji fakültənin komandası qərarlaşıb.
Qalib komandalar I, II və III dərəcəli
diplomlarla təltif olunublar.
Universitetin elmi işlər üzrə prorektoru,
fizika-riyaziyyat elmləri üzrə fəlsəfə doktoru
Anar Kazımov təəssüratlarını bölüşərək
yarışmanın yüksək təşkilinə görə
minnətdarlığını bildirib, qalib komandalara
diplomlar təqdim edib.
Nərmin CƏFƏROVA |
|
