Mayın 6-da Azərbaycan Dövlət Mədəniyyət və
İncəsənət Universitetinin "Səda" tədris
teatrında ümummilli lider Heydər Əliyevin anadan
olmasının 88-ci ildönümünə həsr olunmuş
professor-müəllim heyəti arasında keçirilən IV
spartakiadanın qaliblərinin mükafatlandırılması
mərasimi keçirildi.
Tədbiri giriş sözü ilə açan universitetin Bədən
tərbiyəsi və idman kafedrasının müdiri,
professor, əməkdar məşqçi Ağayusif Qurbanov ulu
öndər Heydər Əliyevin dahi şəxsiyyət olduğunu,
idmana və incəsənətə böyük diqqət və qayğı
göstərdiyini iştirakçıların nəzərinə çatdırdı.
Bildirildi ki, ümummilli liderimiz Heydər Əliyev
Azərbaycan xalqı üçün böyük lider idi və o,
siyasətə də elə lider kimi gəlmişdi. Çağdaş
tariximizdə Azərbaycan dövlətinə böyük bir zaman
kəsiyində başçılıq etmiş Heydər Əliyevin
dövlətçilik tariximizdə qoyub getdiyi irs bu gün
də, sabah da öyrənilməlidir.
Universitetin gördüyü işlər və IV spartakiada
haqqında hesabat verən A.Qurbanov belə
tədbirlərin keçirilməsində ADMİU-nun rektoru,
professor, əməkdar incəsənət xadimi Timuçin
Əfəndiyevin böyük xidməti olduğunu söylədi.
Sonra ADMİU-nun prorektoru, professor Rafiq
Sadıqov universitetin rektoru Timuçin
Əfəndiyevin adından IV spartakiadanın
qaliblərinə mükafatları təqdim etdi.
2010-2011-ci tədris ilində universitetin
ölkədaxili və beynəlxalq yarışlarda əldə etdiyi
nailiyyətlərə görə sənətşünaslıq fakültəsi I
yerə, rejissorluq sənəti fakültəsi II yerə,
rəssamlıq fakültəsi isə III yerə layiq görülüb.
Mükafatlandırılanlar sırasında Azərbaycanın bir
qrup tanınmış incəsənət ustaları ilə yanaşı "Azərbaycan
müəllimi" qəzetinin də adı var. Qəzetimiz
universitetin tədbirlərini işıqlandırdığına və
Azərbaycan gəncliyində milli duyğuları
aşıladığına, təhsilimizin yüksəlməsindəki
xidmətlərinə görə mükafata layiq görülmüşdür.
Hər bir mükafatçıya üzərində ulu öndərin əksi
olan medal və Fəxri diplom təqdim edildi.
Niyazi RƏHİMOV |