|
Mayın 10-da 5 nömrəli Bakı Peşə Liseyində
liseyin direktoru, əməkdar müəllim Mərhəmət
Aslanovanın Azərbaycan Respublikası Təhsil
Nazirliyinin "Qabaqcıl təhsil işçisi" döş nişanı
ilə təltif olunması ilə əlaqədar tədbir
keçirildi. Tədbirdə çıxış edən liseyin
direktoru Mərhəmət Aslanova qonaqları
salamlayaraq rəhbərlik etdiyi təhsil ocağının
qazandığı uğurlar, təhsil sahəsində islahat
Proqramına uyğun tədris prosesinin təşkili,
dərslərdə təlimin müasir forma və metodlarından,
yeni təhsil texnologiyalarından istifadə etməklə
tədrisin elmi, nəzəri və metodiki səviyyəsinin
artırılması, şagirdlərdə Vətənə, xalqa, onun
sərvətlərinə məhəbbət hisslərinin aşılanması
sahəsində görülən işlər haqqında ümumi məlumat
verdi.
Bildirdi ki, hazırda 5 nömrəli BPL-də kompüter
üzrə operator, radio-televizor operatorları
mexaniki, mühasib-fərdi kompüter operatoru,
avtomobil təmiri üzrə çilingər, avtomobil
sürücüsü ixtisasları üzrə 294 şagird təhsil
alır. Bu gün burada oxuyan şagirdlər Vahid
Əhmədov, Qızqayıt Ələkbərova, Yeganə Rəhimova,
Hicran Yusufova kimi qabaqcıl müəllim və
istehsalat təlimi ustalarından seçdikləri
peşələri həvəslə öyrənirlər.
Təhsil ocağında şagirdlərlə dərsdənkənar
vaxtlarda aparılan təlim- tərbiyə işləri də
liseyin pedaqoji kollektivinin qarşısında duran
əsas vəzifələrdən biridir. Bu sahə təlim-
tərbiyə prosesinin tərkib hissəsi olub,
şagirdlərin dərsdənkənar asudə vaxtlarının
səmərəli təşkilində mühüm rol oynayır.
Tədbirdə iştirak edən Təhsil Nazirliyinin baş
məsləhətçisi Kamil Ağamalıyev peşə liseyinin
direktoru Mərhəmət Aslanovanın 40 ildən yuxarı
müxtəlif təlim-tərbiyə müəssisələrində rəhbər
vəzifələrdə işləməsindən söz açdı. Onun ustad
bir pedaqoq olduğunu və indiyə kimi qazandığı
uğurları qeyd etdi.
Sonra Kamil Ağamalıyev Azərbaycan Respublikası
Təhsil Nazirliyi adından respublikanın "Qabaqcıl
təhsil işçisi" döş nişanını və vəsiqəsini
liseyin direktoru Mərhəmət Aslanovaya təqdim
edərək onu təbrik etdi.
Həmin gün onu təbrik edənlər arasında vaxtilə
dərs demiş, hazırda Azərbaycandan kənarda
yaşayan sevimli şagirdləri də var idi.
Şakir CƏFƏROV |
