Lənkəran Dövlət Universitetində ümummilli lider
Heydər Əliyevin anadan olmasının 88-ci
ildönümünə həsr olunmuş "Azərbaycanın inkişaf
strategiyası və aktual elmi problemlər"
mövzusunda respublika elmi konfransı keçirilib.
Tədbir iştirakçıları konfransdan əvvəl LDU-nun "Heydər
Əliyev muzeyi və idarəçilik məktəbi" ilə tanış
olublar.
Lənkəran Dövlət Universiteti, AMEA Lənkəran
Regional Elmi Mərkəzi, AMEA İqtisadiyyat
İnstitutu, Qafqaz Universiteti və Azərbaycan
Turizm İnstitutunun birgə təşkil etdikləri
konfransı LDU-nun rektoru, fizika-riyaziyyat
elmləri doktoru, əməkdar elm xadimi, professor
Asəf İsgəndərov açaraq tədbir iştirakçılarını
salamlayıb və onun məqsəd və vəzifələrindən
danışıb. Lənkəran Şəhər İcra Hakimiyyəti
başçısının humanitar məsələlər üzrə müavini
Səmədağa Abdullayev konfransın işinə uğurlar
arzulayıb.
Sonra universitetin rektoru, professor Asəf
İsgəndərovun "Heydər Əliyev Azərbaycanın milli
inkişaf strategiyasının banisidir" mövzusunda
məruzəsi dinlənilib. Rektor məruzəsində elm və
təhsil sahəsində qazanılan uğurların ulu
öndərimiz Heydər Əliyevin adı və fəaliyyəti ilə
bağlı olduğunu vurğulamışdır.
Konfransda 140-dan çox məruzə dinlənilib. Çıxış
edənlər ümummilli lider Heydər Əliyevin müstəqil
dövlətimizin yaranması, möhkəmlənməsi və dünya
ölkələri arasında tanınmasında tarixi
xidmətlərindən danışıblar. Qeyd edilib ki,
ümummilli lider Heydər Əliyevin xidmətləri
sayəsində müasir Azərbaycan elmi və təhsili
özünün zəngin mütərəqqi ənənələrinə, mənəvi və
ümumbəşəri dəyərlərə, beynəlxalq təcrübəyə
əsaslanaraq daha da inkişaf edib. Tədbir
iştirakçıları milli təhsil quruculuğu
strategiyasının uğurla həyata keçirilməsində
dövlət başçısı İlham Əliyevin çoxcəhətli və
yorulmaz fəaliyyətini yüksək
qiymətləndirdiklərini bildiriblər.
Tədbirdə respublikanın müxtəlif ali
məktəblərinin, qonşu rayonların elm, təhsil
müəssisələrinin və Lənkəran ictimaiyyətinin
nümayəndələri iştirak ediblər.
Hacı Etibar ƏHƏDOV,
Lənkəran Dövlət Universiteti Mətbuat
və informasiya xidmətinin rəhbəri |