Müəllimləri
onlar haqqında belə dedilər
Almaniyanın Düsseldorf şəhərində keçirilmiş
56-cı "Eurovision-2011" mahnı müsabiqəsi başa
çatıb. Azərbaycanı bu yarışmada təmsil edən
Eldar Qasımov və Nigar Camal dueti 25 ölkənin
iştirakı ilə keçən müsabiqənin final
mərhələsində tarixi qələbə qazanıb.
Təmsilçilərimizin ifa etdiyi "Runnung scared"
mahnısı 43 ölkə tamaşaçılarının səsverməsi
nəticəsində 221 xal toplayıb.
Eldar məktəbdə "əla" qiymətlərlə oxuyub
Eldar Qasımov 1989-cu ildə Bakıda
ziyalı ailəsində anadan olub. O, Bakıdakı 160
nömrəli Klassik gimnaziyanın I sinfinə qəbul
olaraq 2006-cı ildə orta təhsilini başa vurub.
Kiçik yaşlarından mahnı oxumağa başlayan Eldar
2001-2005-ci illərdə 2 nömrəli musiqi
məktəbinin fortepiano sinfində təhsil alıb.
2004-cü ildə Azərbaycan Almaniya Şagird
Mübadiləsi
Proqramında iştirak edib. 2006-cı ildə isə
yüksək balla Bakı Slavyan Universitetinun
beynəlxalq münasibətlər və regionşunaslıq
fakültəsinə daxil olub. Nəhayət, 2010-cu ildə
ali məktəbi bitirib. Yeri gəlmişkən onu da qeyd
edək ki, Eldar 2008-ci ildə bir ay ərzində
Almaniyanın Frankfurt-Mayn şəhərində Hote
Universitetində təhsil alıb. Onun haqqında
daha ətraflı məlumat əldə etmək məqsədilə
Eldarın oxuduğu orta və ali məktəblərdə olduq
və ona dərs deyən
müəllimlərlə görüşdük.
Eldarın vaxtilə oxuduğu Bakıdakı 160 nömrəli
Klassik gimnaziyanın direktoru Faina Ələkbərova
və sinif rəhbəri Nelli Mustafayeva bildirdilər
ki, Eldar orta məktəbdə "əla" qiymətlərlə
oxumuşdur. O, gimnaziyada fəaliyyət göstərən
dərnəklərin, o cümlədən rəqs dərnəyinin fəal
üzvü olmuş və məktəbdə uşaq xorunda oxumuşdur.
Həmçinin Eldar gimnaziyanın bütün ictimai
işlərində yaxından iştirak etməklə yanaşı,
həmişə yoldaşlarından alicənablığı ilə
fərqlənmişdir. Doğrusu, onun əldə etdiyi
uğurlarda valideynlərinin, əsasən də anası və
nənəsinin zəhməti böyük olmuşdur. Çünki bu
şəxslər Eldarın bilikli və bacarıqlı olması
üçün həyatda çox çalışıblar. Onu musiqi ilə
bağlı bütün dərnəklərə yazdırıblar ki, Eldar
bir şəxsiyyət və bacarıqlı musiqiçi kimi
formalaşsın.
Eldar Qasımovun ali təhsil aldığı Bakı Slavyan
Universitetinin beynəlxalq münasibətlər və
regionşünaslıq fakültəsinin dekanı, dosent Adil
Rəcəbli isə bizə bildirdi ki, indi hamının
sevimlisinə çevrilmiş Eldar Qasımov haqqında
müəllimi kimi fikir söyləmək mənə də xoşdur.
O, BSU-da oxuduğu 4 il müddətində dərin
nəzəri biliklərə malik olması, çalışqanlığı və
nəzakəti ilə tələbə və professor-müəllim heyəti
arasında böyük hörmət qazanmışdır. Təsadüfi
deyil ki, I kursun sonunda tələbələr onun
ictimai fəallığını nəzərə alaraq 650 -dən çox
tələbəni birləşdirən fakültə tələbə həmkarlar
təşkilatına sədr seçmişlər.
O
vaxtdan tələbələrin yaxın dostu olan Eldar bu
gün də ənənəsinə sadiq qalır. Eldar ali
məktəbi fərqlənmə diplomu ilə bitirdikdən sonra
BSU-nun magistratura şöbəsində təhsilini davam
etdirir. Bu gün onun "Esprit Arena"sında 56-cı
"Eurovision" mahnı müsabiqəsində qazandığı
uğura görə başqaları kimi onun təhsil aldığı
BSU-nun bütün kollektivi də sevinc
içərisindədir.
Nigar
uşaq yaşlarından ansamblda solist kimi çıxış
edib
"Eurovision -2011" mahnı müsabiqəsində
Azərbaycanı təmsil edən digər qaliblərdən biri
də Nigar Camal olub. O, 1980-ci ildə Bakı
şəhərində anadan olub. 1997-ci ildə Bakıdakı
203 nömrəli orta məktəbi bitirib.
1985-1986-cı illərdə şəhər uşaq ansamblında
solist kimi çıxış edib. Həmçinin 1988-1996-cı
illərdə "Pöhrə" respublika mahnı müsabiqəsində
iştirak edib və 1996-cı ilin may ayında bu
müsabiqənin "Fəxri diplom"unu qazanıb.
Nigar Camal 1997-ci ildə Xəzər Universitetinin
iqtisadiyyat və menecment fakültəsinə daxil
olaraq oranı bitirib. Sonra 2005-ci ildə ailə
həyatı quraraq Londona köçüb. Yasmin və Səidə
adlı 2 qızı var.
203 nömrəli orta məktəbdə də Nigara Azərbaycan
dilindən dərs deyən, məktəbin tədris işləri
üzrə direktor müavini Sevil İmanova və
coğrafiya müəllimi Nuridə Şabanova ilə
söhbətləşdik. Bildirdilər ki, hər ikisinin
övladları Nigarla bir sinifdə oxumuşlar.
Övladlarını tanıdıqları qədər Nigarı da yaxşı
tanıyırlar. Nigar dərslərini yaxşı oxumaqla
bərabər, həm də təşkilati işləri çox sevirmiş.
Musiqiyə həvəs isə onda hələ erkən yaşlarından
başlamışdır.
Biz məktəbdə olanda Nigar haqqında digər
müəllimlərin də xoş sözlərini eşitdik. Şahidi
olduq ki, məktəbin pedaqoji kollektivi
Nigarın qazandığı uğura çox sevinirlər. Axı bu
uğurun qazanılmasında Nigara dərs deyən, yol
göstərən müəllimlərin də payı var.
Şakir CƏFƏROV |