Əsası ötən əsrin 30-cu illərində qoyulmuş Saatlı
rayonundakı Qaralar (indiki Varxankənd)
məktəbinin son 50 ildə keçdiyi şərəfli yolda
əldə etdiyi nailiyyətlərdən bəhs edən kitab bu
günlərdə işıq üzü görüb. Varxankənd tam orta
məktəbinin direktoru Lətif Şimşəkovun ikiillik
gərgin zəhməti nəticəsində araya-ərsəyə gəlmiş
kitabı Axıska türklərinin bir parçası olan
Saatlı rayonunun Varxan kəndində 1959-cu ildən
məskunlaşmış əhalinin uşaqlarının təhsil aldığı
məktəbin 50 illik yubileyinə layiqli töhfə kimi
qiymətləndirmək olar. "Müəllifdən" adlı girişdən
və 6 bölmədən olan kitabın ilk səhifələrində
məktəbin yaranma tarixi və keçdiyi yol haqqında
geniş məlumat verilib. "Məktəb rəhbərləri,
pedaqoji və texniki işçilər" adlanan bölmədə
Varxankənd məktəbində 1959-cu ildən bu günə kimi
işləmiş məktəb direktorları, tədris işləri üzrə
direktor müavinləri, tərbiyə işləri üzrə
direktor müavinləri, GÇH (Hərbi hazırlıq)
rəhbərləri, UBT rəhbərləri, təsərrüfat işləri
üzrə direktor müavinləri, məktəbdə işləyən
müəllimlər (162 nəfər), məktəbin kitabxanaçıları
və digər işçiləri haqqında söz açılıb.
Kitabın II bölməsi "Məktəbin statistik
göstəriciləri" adlanır. Burada 1959-1960-cı
tədris ilindən 2008 - 2009-cu tədris ilinədək
(50 tədris ili ərzində) siniflər, müəllimlər,
şagirdlər və məzunların sayı, məktəbi "4" və "5"
qiymətlərlə bitirənlər haqqında geniş məlumat
verilib. Həmçinin bu bölmədə məktəbin
məzunlarından ali təhsil alanlar, məktəbin
şagirdlərinin fənn olimpiadalarında uğurları
barədə ətraflı söhbət açılıb.
Kitabın III bölməsi "Unudulmaz müəllimlərimiz"
adlanır ki, burayada Varxankənd orta məktəbində
1959-cu ildən çalışan və dünyasını dəyişən
müəllimlərin həyatı və pedaqoji fəaliyyətləri
haqqında geniş məlumatlar daxil edilmiş, onların
Varxankənd-Qaralar məktəbinin inkişafı yolunda
çəkdikləri zəhmət qeyd olunub.
Kitabın IV - "Şəhidlərimiz unudulmur" adlı
bölməsində Varxankənd orta məktəbində vaxtilə
təhsil almış və Qarabağ müharibəsində şəhid
olmuş məzunların həyat yolu işıqlandırılıb.
Kitabın V bölməsi "Cəfakeş müəllimlərimiz"
adlanır. Burada 1959-cu ildən etibarən müxtəlif
işlərdə işləmiş, həmçinin hazırda fəaliyyət
göstərən müəllimlər haqqında söhbət açılıb.
Kitabın sonuncu "Gənc müəllimlərimiz"
bölməsində isə 2006-cı ildən sonra işə qəbul
olunan və hazırda məktəbdə işləyən müəllimlərin
şəkilləri oxuculara təqdim edilir.
Qeydləri nəzərə alıb kitabı tam əsasla 50 yaşlı
məktəbin salnaməsi hesab etmək olar. |