Mayın
31-də respublikamızın bütün məktəblərində olduğu
kimi, Bakıdakı 239 nömrəli məktəbdə də "Doğma
Vətən, biz gəlirik!" adlı "Son zəng" mərasimi
keçirildi. Tədbirdə Səbail Rayon İcra
Hakimiyyətinin şöbə müdiri Elman Yahyayev, Bakı
Şəhəri üzrə Təhsil İdarəsinin
nümayəndələri-Qənirə Sultanova, Əfqan İsgəndərov,
Əsmayə Cavadova, daxili qoşunların N saylı hərbi
hissəsinin zabit və əsgərləri və digər qonaqlar
iştirak edirdilər.
Tədbiri giriş sözü ilə açan məktəbin direktoru
Sədaqət Əzimova qonaqları salamladı, məzunları
və onların valideynlərini təbrik etdi. Qeyd etdi
ki, ulu öndər Heydər Əliyevin siyasi kursunu
uğurla davam etdirən möhtərəm Prezident İlham
Əliyevin və Heydər Əliyev Fondunun prezidenti
Mehriban xanım Əliyevanın diqqət və qayğısı
nəticəsində təhsilimiz uğurla inkişaf edir.
Gənclərə yaradılan şəraitdən söz açan S.Əzimova
onların gələcəkdə böyük uğurlar əldə edəcəyinə
və respublikamızın daha da inkişaf etməsində öz
töhfələrini verəcəklərinə ümidvar olduğunu
nəzərə çatdırdı. Bildirildi ki, məktəbdə
şagirdlərə vətənpərvərlik hisslərini aşılamaq
yolunda ciddi işlər aparılır. Artıq neçə ildir
ki, məktəb daxili qoşunlarla sıx əlaqə saxlayır.
Daxili qoşunların komandanı, general-leytenant
Zakir Həsənovun rəhbərliyi altında məktəbdə
"mini kazarma" yaradılıb. Həmin kabinet yuxarı
sinif şagirdlərinin hərbi ruhda tərbiyə
olunmalarında müsbət rol oynayır.
S.Əzimova başa çatan tədris ilində məktəbin
şagirdlərinin bir çox olimpiadalarda və
müsabiqələrdə uğurla çıxış etdiklərini diqqətə
çatdırdı.
Çıxış edənlər məzunları və birinciləri təbrik
edərək, onların xalqımıza, dövlətimizə layiqli
vətəndaş olmalarını arzuladılar. Birincilər
əllərindəki gül və hədiyyələrlə onbirinciləri
təbrik edib şeirlər söylədilər. Məktəbin "Şahinlər",
"Cəsurlar" komandaları və qalib idmançıları
hərbi keçid etdilər. Simvolik açar direktora
təqdim edildikdən sonra son zəng çalındı.
Niyazi RƏHİMOV |