|
 Bakı
Dövlət Universiteti ilə Almaniyanın Julius
Maksimilian Vürzburq Universiteti arasında
"Avropa hüququ üzrə magistr" proqramının
yaradılmasına dair əməkdaşlıq sazişi imzalanıb.
Sazişi Almaniya tərəfindən Vürzburq
Universitetinin Beynəlxalq əlaqələr və
informasiya texnologiyaları üzrə prorektoru,
professor Eckhard Pache, Azərbaycan tərəfindən
isə BDU-nun rektoru, akademik Abel Məhərrəmov
imzalayıblar.
Avropa
hüququnun son zamanlarda hüquq elminin ən
dinamik inkişaf edən və prioritet təşkil edən
istiqamətlərdən birinə çevrildiyini deyən rektor
Abel Məhərrəmov bu əməkdaşlığın ölkəmiz üçün çox
əhəmiyyətli olacağını qeyd edib.
Tədbirdə
iştirak edən təhsil nazirinin müavini Elmar
Qasımov BDU-nun Hüquq fakültəsinin ölkəmizin ən
məşhur hüquqşünaslarını hazırladığını və layiqli
kadrlar yetişdirilməsində illərdən bəri lider
mövqeyini saxladığını bildirib.
Almaniyalı
qonaqlar - Beynəlxalq əlaqələr və informasiya
texnologiyaları üzrə prorektor, professor
Eckhard Pache və Hüquq fakültəsinin dekanı,
professor Eric Hilgendrof BDU ilə tanış olub,
daxili işlər naziri Ramil Usubovun sədrliyi ilə
Hüquq fakültəsində keçirilən bakalavr pilləsi
üzrə diplom işinin müdafiəsində iştirak ediblər.
Qeyd edək ki,
"Avropa hüququ üzrə magistr" proqramı dörd
semestr davam edəcək. Birinci təhsil ili (iki
semestr) magistrantlar Bakıda alman dilini
öyrənəcək və Azərbaycanın magistr təhsilinə
uyğun olaraq təhsillərini davam etdirəcəklər.
İkinci təhsil ilində (iki semestr)
magistrantlara şəxsi hesablarına Almaniyanın
Vürzburq Universitetində təhsillərini davam
etdirmək və magistr dissertasiyasını hazırlamaq
imkanı veriləcək. Mühazirələr alman və
azərbaycanlı müəllimlər tərəfindən deyiləcək.
Sonda
magistrlərə ikili diplom - Vürzburq Universiteti
və BDU-nun Hüquq fakültələrinin diplomu
veriləcək.
BDU-nun Mətbuat və informasiya şöbəsi |
