Respublikanın
bütün fəaliyyət sahələrində baş verən dinamik
inkişafın mənbəyində düşünülmüş siyasət əsasında
aparılan genişmiqyaslı islahat tədbirlərinin
dayanması bugünümüzün danılmaz həqiqətidir.
Keçmişin mütərəqqi ənənələrinə, beynəlxalq
miqyasda sınaqdan çıxmış təcrübəyə söykənmiş
həmin islahatlar ölkəmizdə artıq dönməz xarakter
almaqla irəliləyişlərin təminatçısına
çevrilmişdir. Bu mənada təhsil sahəsi də istisna
deyildir.
Hazırda Azərbaycan özünün təhsil sistemini
dünyanın ən mütərəqqi ölkələrinin təhsil
prinsiplərindən istifadə etməklə təkmilləşdirir,
məzmun və struktur dəyişiklikləri aparır.
Azərbaycanda dövlət müstəqilliyinin bərpasından
sonra ölkədə ictimai-siyasi mənzərənin,
ideologiyanın, iqtisadi münasibətlərin kökündən
dəyişməsi təhsilin məqsədlərinə, vəzifələrinə,
onun məzmunu ilə bağlı tələblərə də yeni yanaşma
tərzi, yeni baxışlar formalaşdırdı. İnkişaf
etmış ölkələrin təhsil sahəsində əldə etdikləri
qabaqcıl təcrübənin öyrənilməsi bu məsələdə
həlledici rol oynadı.
Təhsil sahəsində qabaqcıl təcrübənin öyrənilməsi
və tətbiqi bütün təhsil müəssisələrinin əsas
istiqamətlərindən birinə çevrilmişdir. Bununla
əlaqədar olaraq respublikanın bir çox təhsil
müəssisələri Azərbaycan Müəllimlər İnstitutu ilə
sıx əməkdaşlığa üstünlük verirlər.
Bu günlərdə Azərbaycan Respublikası Daxili İşlər
Nazirliyi A.N.Heydərov adına Sıravi və Kiçik
Rəis Heyəti Hazırlayan Məktəbin rəisi, polis
polkovniki Ramiz Abdullayev Azərbaycan
Müəllimlər İnstitutunun rektoruna müraciət
edərək, məktəbin müəllim heyətinə "Yeni təlim
texnologiyaları", "Fəal və interaktiv təlim
üsulları" və digər innovasiyaların öyrədilməsi
üçün 5 günlük "Öyrədənlərin öyrədəni" təlim
treninqinin keçirilməsini xahiş etmişdir.
Azərbaycan Müəllimlər İnstitutunun rektoru,
professor, millət vəkili Aqiyə xanım
Naxçıvanlının imzaladığı əmri ilə institutun bir
qrup əməkdaşı DİN-nin A.N.Heydərov adına Sıravi
və Kiçik Rəis Heyəti Hazırlayan Məktəbin
pedaqoji işçiləri üçün 5 günlük "Fəal interaktiv
təlim üsulları" mövzusunda "Öyrədənlərin
öyrədəni" təlim treninqi keçirmişdir.
Treninqin təşkil edilməsində məqsəd təhsilin
keyfiyyətinin yüksəldilməsi, müəllimlərdə fəal
təlim və onun tətbiqi yolları haqqında
biliklərin aşılanması və onlarda zəruri
bacarıqların formalaşdırılması, fəal təlim
metodlarının tətbiqi zamanı qarşıya çıxan
problemlərin həlli yollarının
müəyyənləşdirilməsi olmuşdur.
Treninq keçirilən zaman aşağıdakı nəticələr
gözlənilirdi: Fəal təlimin nəzəri, təşkilati və
metodiki aspektlərinin nəzərdən keçirilməsi və
tətbiqi, fəal təlim üsulu ilə dərsin keçirilmə
əsasları ilə tanışlıq, fəal təlim üsulu ilə
işləyən müəllimin əsas vəzifələri ilə tanışlıq,
müəllimdə fəal təlim üsulu ilə dərsin
keçirilməsi üçün vacib olan bacarıq və
keyfiyyətlərin formalaşması və fəal təlim
metodlarının tətbiqi məsələlərinin həlli üzrə
biliklərə yiyələnmək.
Treninq ərzində dinləyicilərə beyin həmləsi,
BİBÖ, ziqzaq, şaxələndirmə, Venn diaqramı,
insert, karusel, müzakirə, debat, diskussiya və
başqa üsullar ətraflı izah edilmiş, nümunəvi
dərslər təşkil edilmiş və onların təqdimatları
dinlənildikdən sonra qiymətləndirmə
aparılmışdır.
İyulun 6-da treninqin yekununa və dinləyicilərə
sertifikatlar verilməsinə həsr olunmuş "dəyirmi
masa" təşkil edilmişdir. Tədbirdə məktəbin
rəisi, polis polkovniki Ramiz Abdullayev,
Azərbaycan Müəllimlər İnstitutunun Əlavə təhsil
üzrə prorektoru Rahim Əzizov, məktəbin rəis
müavinləri, şöbə müdirləri, Azərbaycan
Müəllimlər İnstitutunun təlimçiləri və
dinləyicilər iştirak edirdilər.
Tədbiri giriş sözü ilə açan polis polkovniki
Ramiz Abdullayev treninqin əhəmiyyətini, onun
müəllimlər və kursantlar üçün vacibliyini qeyd
edərək, bu treninqin keçirilməsinə köməklik
etdiyi üçün Azərbaycan Müəllimlər İnstitutunun
professor-müəllim heyətinə, xüsusən institutun
rektoru, professor, millət vəkili Aqiyə xanım
Naxçıvanlıya öz dərin minnətdarlığını bildirdi.
Rahim Əzizov çıxış edərək Azərbaycan Müəllimlər
İnstitutunun bu sahədə yaxşı iş təcrübəsi və
kadr potensialı mövcudluğunu, hər bir təhsil
müəssisəsinə köməklik göstərməyə daim hazır
olduğunu və son beş ildə əlavə təhsil üçün güclü
maddi-texniki baza yaradıldığını qeyd etdi.
Digər çıxış edənlər polis
polkovnik-leytenantları Mehman Salahov, Rizvan
Hüseynov, Azərbaycan Müəllimlər İnstitutunun
əməkdaşı Eldəniz İsmayılov və başqaları
treninqin təşkilinə və keçirilməsinə görə öz
razılıqlarını bildirdilər.
Tədbirin sonunda dinləyicilərə sertifikatlar
təqdim olundu.
Leyla ƏLİYEVA,
AMİ-nin Təhsildə innovasiyalar kabinetinin
müdiri |