İbtidai təhsilin keyfiyyətini yüksəltmək üçün,
ilk növbədə, fənn kurikulumu, təlim
strategiyaları və yeni qiymətləndirmə
mexanizmlərinin tətbiqini həyata keçirəcək
müəllimlərin pedaqoji-metodik bacarıqlarını və
fənn üzrə biliklərini artırmaq, yeniləşdirmək
lazımdır. Bu məqsədlə ibtidai sinif
müəllimlərinin yeni fənn kurikulumunun tətbiqi
üzrə təlim kurslarından keçirilməsi sahəsində
son üç il ərzində müəyyən təcrübə əldə edilmiş,
2008-ci ildən başlayaraq yay aylarında
Azərbaycanın bütün rayonları əhatə olunmaqla,
minlərlə ibtidai sinif müəllimi təlim
kurslarından keçmişdir.
2010-2011-ci
tədris ilində isə I siniflərdə dərs deyəcək 8
minə yaxın ibtidai sinif müəllimi üçün yeni fənn
kurikulumları üzrə təlimlər Təhsil Sektorunun
İnkişafı üzrə İkinci Layihə çərçivəsində tender
yolu ilə, yeni ixtisasartırma modeli əsasında
həyata keçirilmişdir.
2011-2012-ci tədris ilində respublikanın ümumi
təhsil müəssisələrində 1-ci sinifdə dərs deyəcək,
həmçinin son 3 ildə təlim kurslarından keçməyən
ibtidai sinif müəllimlərinin fənn
kurikulumlarının tətbiqi sahəsində nəzəri və
praktik hazırlığının təmin edilməsi nəzərdə
tutulmuş və bu istiqamətdə müvafiq təşkilati
işlər aparılmış, müəllimlərin ixtisasartırma
təhsili üzrə xidmətlərin təklifi sahəsində
rəqabət mühitinin yaradılmasına səy
göstərilmişdir. Ötən müddət ərzində həmin
vəzifənin icrası ilə əlaqədar bir sıra tədbirlər
yerinə yetirilmişdir. Müəllimlərin
ixtisasartırma təhsilinin yeni model,
modul-kredit sistemi ilə həyata keçirilməsini
nəzərdə tutan sənəd - "Əlavə təhsilin məzmunu,
təşkili və əlavə təhsilin hər hansı istiqaməti
üzrə təhsil almış şəxslərə müvafiq sənədin
verilməsi qaydası" hazırlanmış və Nazirlər
Kabinetinin qərarı ilə təsdiq edilmişdir.
Təhsil Nazirliyi 2011-2012-ci tədris ilində 1-ci
siniflərdə dərs deyəcək ibtidai sinif
müəllimləri üçün təlim kurslarını təşkil edəcək
qurumları müəyyənləşdirmək məqsədilə cari ilin
yanvar-fevral aylarında tender elan etmişdir.
Qaydaya əsasən, bu tenderdə yalnız qeyri-hökümət
təşkilatları iştirak edə bilər. Tender
sənədlərində təlim xidmətlərinin respublikanın
bütün rayon və şəhərləri əhatə olunmaqla 9
iqtisadi zona üzrə həyata keçirilməsi nəzərdə
tutulmuşdur. Tender komissiyasına 7 təşkilatdan
müraciətlər olmuş, təqdim olunmuş sənədlərin
araşdırılması və qiymətləndirilməsi aparıldıqdan
sonra 5 təşkilat təlim kurslarını keçirmək
hüququ qazanmışdır. Həmin qurumlardan biri də
Müasir Təhsil və Tədrisə Yardım Mərkəzidir.
Bu təşkilata Abşeron (3 təlim mərkəzində 580
nəfər müəllim, 8 nəfər təlimçi), Aran (19 təlim
mərkəzində 2280 nəfər müəllim, 36 nəfər təlimçi),
Dağlıq Şirvan (4 təlim mərkəzində 340 nəfər
müəllim, 8 nəfər təlimçi) və Yuxarı Qarabağ (5
təlim mərkəzində 490 nəfər müəllim, 9 nəfər
təlimçi) iqtitsadi zonaları üzrə təlim
kurslarını təşkil etmək həvalə olunub.
İyun-avqust aylarında adıçəkilən 4 iqtisadi zona
üzrə 31 təlim mərkəzində cəmi 3690 nəfər ibtidai
sinif müəllimi təlim kurslarından keçiriləcək.
Onlarla 61 nəfər təlimçi məşğul olacaq.
Artıq yayın ilk ayı başa çatıb. Müasir Təhsil və
Tədrisə Yardım Mərkəzindən aldığımız məlumata
görə, bu ay ərzində təşkil edilən təlim
kurslarında cəmi 779 müdavim iştirak edib.
Onlardan 164 nəfəri Abşeron iqtisadi zonası, 151
nəfəri Yuxarı Qarabağ iqtisadi zonası (Füzuli-67
nəfər, Ağdam - 84 nəfər), 132 nəfəri Dağlıq
Şirvan iqtisadi zonası (Qobustan - 50 nəfər,
Şamaxı - 82 nəfər), 496 nəfər ibtidai sinif
müəllimi isə Aran iqtisadi zonası (İmişli - 122
nəfər, Beyləqan - 96 nəfər, Şirvan - 81 nəfər,
Salyan - 197 nəfər) üzrə təşkil olunan təlim
mərkəzlərində kursdan keçirilib.
Hicran ƏKBƏROVA |
|