Sentyabrın
27-də Azərbaycan Dövlət İqtisad Universitetinin
80 illik yubileyi qeyd edildi. Bu münasibətlə
universitetin akt zalında keçirilən təntənəli
yubiley mərasimində ölkənin dövlət və hökumət
rəsmiləri, millət vəkilləri, Azərbaycanda
akkreditə olunmuş səfirliklərin başçıları,
Rusiya, Türkiyə, Şimali Kipr, Özbəkistan,
Qazaxıstan və digər ölkələrin universitet
rektorları, ölkəmizin aparıcı ali təhsil
müəssisələrinin və elm mərkəzlərinin rəhbərləri,
ictimaiyyət nümayəndələri iştirak edirdilər.
İclas başlanmazdan öncə universitetin əsas
korpusunun girişində ümummilli lider Heydər
Əliyevin 1952-1957-ci illərdə burada təhsil
almasını əks etdirən xatirə lövhəsinin açılışı
oldu. Sonra mərasim iştirakçıları ulu öndərin
universitetin foyesindəki abidəsini ziyarət edib
önünə tər çiçək dəstələri düzdülər.
Təntənəli yubiley iclasını təhsil naziri Misir
Mərdanov açaraq ölkə Prezidenti İlham Əliyev
cənablarının salamını mərasim iştirakçılarına və
yubilyar ali məktəbin kollektivinə çatdırdı.
Ölkə Prezidentinin 26 sentyabr 2011-ci il
tarixli sərəncamları ilə Azərbaycan Dövlət
İqtisad Universitetinin bir qrup əməkdaşının
"Şöhrət" ordeni və "Tərəqqi" medalı, "Əməkdar
müəllim" fəxri adı ilə təltif olunduğunu deyən
nazir həmin sərəncamları iclas iştirakçılarının
diqqətinə çatdırdı və təltif olunanları təbrik
etdi. Misir Mərdanov İqtisad Universitetinin 80
illik yubileyinin keçirilməsi və yubiley
ərəfəsində universitetin bir qrup əməkdaşının
təltif olunması haqqında Prezident
sərəncamlarını ölkə başçısının təhsilə, təhsil
işçilərinə diqqət və qayğısının daha bir bariz
nümunəsi kimi dəyərləndirdi və göstərdiyi bu
diqqət və qayğıya görə universitetin kollektivi
adından Prezident İlham Əliyevə minnətdarlığını
bildirdi.
Nazir habelə universitetin bir qrup əməkdaşının
Təhsil Nazirliyinin "Azərbaycan Respublikası
qabaqcıl təhsil işçisi" döş nişanına və fəxri
fərmanlara layiq görüldüyünü də diqqətə
çatdırdı.
ADİU-nun
yubileyini Azərbaycan təhsilinin bayramı hesab
edən nazir mərasimə qatılmış bütün qonaqlara,
əksəriyyəti universitetin məzunları olan dövlət
və hökumət orqanlarının təmsilçilərinə və millət
vəkillərinə dəvəti qəbul edib gəldikləri üçün
təşəkkürünü bildirdi. Nazir yubiley mərasimində
dünyanın bir çox tanınmış alimlərinin, xüsusən
də iqtisadiyyat üzrə üç Nobel mükafatçısının,
habelə Nobelin nəticəsi Flipp Nobelin iştirak
etməsini sevindirici hal sayıb, bunu həmin
şəxslərin, bütövlükdə dünyanın ölkəmizə,
Azərbaycan Prezidentinin rəhbərliyi ilə
Azərbaycanda həyata keçirilən iqtisadi
islahatlara hörməti kimi qiymətləndirdi. Nazir
onu da diqqətə çatdırdı ki, Azərbaycan Dövlət
İqtisad Universitetinin vaxtilə ulu öndər Heydər
Əliyevin də təhsil aldığı bu tarixi binası son
bir ildə cənab Prezidentin tapşırığı ilə əsaslı
şəkildə təmir olunaraq yenidən qurulub və
burada tələbələr üçün yüksək şərait yaradılıb.
Çıxışında ölkəmizdə ali təhsilin inkişafı
istiqamətində görülmüş bəzi işlərə də toxunan
nazir möhtərəm Prezidentimizin diqqət və qayğısı
nəticəsində ali təhsil müəssisələrinin, demək
olar ki, hamısının maddi-texniki bazasının
əsaslı şəkildə yenidən qurulduğunu, bu işin
davam etdiyini bildirdi. Qeyd etdi ki, bu gün
Azərbaycanın ali məktəblərində 7 mindən çox
xarici ölkə vətəndaşı təhsil alır. Bu,
Azərbaycan təhsilinə dünyada olan hörmətin
əlamətidir. Eyni zamanda, bu gün 10 mindən çox
Azərbaycan vətəndaşı xarici ölkələrin nüfuzlu
ali məktəblərində təhsillərini davam etdirirlər.
Təkcə bu il məlum Dövlət Proqramı çərçivəsində
300-dən çox azərbaycanlı gənc xarici ölkələrin
nüfuzlu ali məktəblərinə göndərilib.
Təhsil naziri çıxışının sonunda Azərbaycanın
bütün təhsil işçiləri adından Azərbaycan Dövlət
İqtisad Universitetinin 80 illik yubileyi
münasibəti ilə bu ali təhsil müəssisəsinin
kollektivini təbrik edib, ölkəmizdə iqtisad
elmlərinin inkişaf etdirilməsində universitetə
daha böyük uğurlar arzuladı.
İclasda Azərbaycan Dövlət İqtisad
Universitetinin rektoru, Milli Məclisin elm və
təhsil komitəsinin sədri, professor Şəmsəddin
Hacıyev yubilyar ali məktəbin keçdiyi 80 illik
tarixi yol, ölkəmizin iqtisad elminə və
təhsilinə verdiyi töhfələr, son illər
universitetdə aparılan islahatyönümlü işlər
barədə geniş məruzə etdi.
Rektor öncə təhsilimizə göstərdiyi diqqət və
qayğıya görə kollektiv adından Prezident İlham
Əliyevə dərin minnətdarlığını bildirdi.
Universitetlərinin tarixindən söz açan rektor
əsasının qoyulduğu 1930-cu ildən bəri bu ali
təhsil ocağının adının bir neçə dəfə
dəyişdiyini, üç dəfə bağlanaraq yenidən
açıldığını qeyd etdi. Bildirdi ki, təhsil ocağı
mövcud olduğu illər ərzində sənaye, kənd
təsərrüfatı, statistika, maliyyə, vergi sistemi
və s. sahələrin yüksək ixtisaslı kadrlarla təmin
edilməsində mühüm rol oynamış, burada ölkə üçün
120 mindən çox müxtəlif profilli iqtisadçı
hazırlanmışdır.
Vurğulandı ki, son illər universitetin
maddi-texniki bazası xeyli möhkəmlənmiş,
respublikanın Avropa təhsil məkanına
inteqrasiyası ilə əlaqədar tədris planları və
proqramlar müasir tələblərə uyğunlaşdırılmışdır.
ADİU-da informasiya-kommunikasiya
texnologiyaları geniş tətbiq olunur. Ölkəmizdə
ilk dəfə burada "Magistr hazırlığı mərkəzi"
elmi-tədqiqat institutu yaradılmışdır.
Rektor dedi ki, Azərbaycan Prezidenti İlham
Əliyev 2007-ci ilin oktyabrında ADİU-nun yeni
korpusunun açılış mərasimində iştirak etmiş və
proqram xarakterli nitq söyləmişdir. O,
universitetdə həyata keçirilən islahatlara çox
yüksək qiymət vermiş, kollektivə ən xoş
arzularını yetirmişdir.
Bildirildi ki, Azərbaycan Prezidentinin
göstərişi ilə başlanmış ADİU-nun Dərbənd
filialının yeni təhsil kompleksinin tikintisi
başa çatmaqdadır. Müasir tələblərə cavab verən
tədris korpuslarında 1500 tələbənin təhsil
alması üçün hər cür imkan yaradılacaqdır. Kampus
tipli yeni təhsil kompleksinə 200 nəfərlik
tələbə yataqxanası, kitabxana, yeməkxana, idman
zalı, hovuz, həmçinin 200 nəfərlik lisey
daxildir.
Qeyd olundu ki, Cənubi Qafqaz ölkələrinin ən iri
təhsil ocaqlarından biri sayılan ADİU-da hazırda
11 fakültədə 21 ixtisas üzrə 16 mindən çox, o
cümlədən dünyanın 14 ölkəsindən 850-dək tələbə
və magistr təhsil alır. Kollektivin əsas hədəfi
universiteti elmi-innovasiya universitetinə
çevirməkdir.
Sonra təbrik çıxışları oldu. İqtisadiyyat üzrə
Nobel mükafatı laureatları Erik Maskin, Finn
Kidland, Kristofer Pissarides, Azərbaycan
Mərkəzi Bankı İdarə Heyətinin sədri Elman
Rüstəmov, Azərbaycan Tibb Universitetinin
rektoru Əhliman Əmiraslanov, Bakı Dövlət
Universitetinin rektoru Abel Məhərrəmov, YAP
sədrinin müavini Əli Əhmədov, Azərbaycan
Həmkarlar İttifaqları Konfederasiyasının sədri
Səttar Mehbalıyev, Milli Məclisin komitə
sədrləri Rəbiyyət Aslanova, Ziyad Səmədzadə,
AMEA-nın I vitse-prezidenti Arif Həşimov,
Azərbaycan Dövlət Aqrar Universitetinin rektoru
Mirdaməd Sadıqov, Azərbaycan Dillər
Universitetinin rektoru Səməd Seyidov və b.
çıxış edərək yubileyi münasibəti ilə ADİU-nun
çoxminli kollektivinə təbriklərini çatdırdılar,
ölkəmizdə iqtisad elminin inkişafında, yeni
iqtisadçılar nəslinin yetişməsində universitetin
mühüm rolundan söz açdılar.
Təntənəli iclasdan sonra iştirakçılar
universiteti gəzib onun müasir tələblərə cavab
verən tədris şəraiti ilə tanış oldular.
Yusif ƏLİYEV |