Mən
1998-2002-ci illər ərzində ADPU-nin filologiya
fakültəsində təhsil almışam. 2004-cü ildən bu
tədris ilinə qədər 13 nömrəli Bakı Peşə
Liseyində Azərbaycan dili və ədəbiyyat müəllimi
vəzifəsində çalışmışam. Artıq 7 illik pedaqoji
iş stajım var. Bu illər ərzində dəfələrlə yeni
tədris metodları ilə əlaqədar kurslarda olmuş,
pedaqogika və metodikadan biliklərimi artırmağa
çalışmışam. 13 nömrəli BPL-nın rəhbərliyi və
kollektiv heyəti ilə işləmək mənə xoş idi. Amma
illərlə arzum olub ki, pedaqoji fəaliyyətimi
orta məktəbdə davam etdirim. Bu məqsədlə bu il
Təhsil Nazirliyi tərəfindən ümumtəhsil
məktəblərində vakant yerlərə keçirilən
müsabiqədə özümü sınamağı qərara aldım və
elektron ərizəmi doldurdum. Avqustun 8-də
imtahanda iştirak etdim və uğur qazandım.
İmtahan çox obyektiv şəkildə keçirildi. Bu işin
şəffaflığı sənəd vermiş bütün vakantçılarda
sevinc hissi yaratmışdı. Biz çox inanırdıq ki,
hər şey biz vakantçıların xeyrinə olacaq. Mən
33,54 balla seçdiyim Sabunçu rayon E.Ağayev
adına 198 nömrəli məktəbə qəbul olundum.
Məktəblə ilk tanışlığım məndə xoş təəssürat
yaratdı.
Məktəbin direktoru Şəlalə Nadirovaya açdığım ilk
telefon zəngindən seçimimdə yanılmadığıma bir
daha əmin oldum.
Böyük sevgiylə işə başlamaq qərarına gəldim.
Sevimli məktəbimə ayaq basdığım gündən müəllim
kollektivinin mehriban və səmimi olduğuna çox
sevindim.
Ən sevindirici hal isə bu idi ki, məktəbin
rəhbəri Şəlalə Nadirova kollektivi tamamilə gənc
kadrlarla yeniləşdirmişdi. Mənimlə bərabər
coğrafiya, biologiya, fizika, informatika və
digər fənlər üzrə 13 vakant iş yerinə müəllimlər
də işə qəbul olunmuşdular. Bu isə onu göstərir
ki, rəhbərlik öz işində məsuliyyətli olduğu
qədər də inamlıdır. Şəlalə xanımın bizlərə olan
isti münasibəti bizi bu yeni kollektivə
doğmalaşdırdı.
Hazırda V a, V b və VII a siniflərində
Azərbaycan dili və ədəbiyyat fənlərini tədris
edirəm. Ayaq basdığım ilk sinif isə VII a sinfi
oldu. Uşaqlarla apardığım frontal sorğu məni
valeh etdi. Onlar çox fəal idilər. Məktəbimizdə
VII a kimi siniflərin sayı kifayət qədərdir.
Biz vakantçılar çox sevinirik ki, E.Ağayev adına
198 nömrəli məktəbi özümüzə yeni iş yeri
seçmişik. Biz müəllimlər üçün yaratdıqları bu
şəraitə görə Təhsil Nazirliyinə dərin
təşəkkürümüzü bildiririk. Mən həm də E.Ağayev
adına 198 nömrəli məktəbin direktoru Şəlalə
Nadirovaya və kollektivə göstərdikləri isti
münasibətə görə çox minnətdaram.
Vüsalə ZÖHRABOVA,
Bakı şəhər E.Ağayev adına 198 nömrəli məktəbin
Azərbaycan dili və ədəbiyyat müəllimi |