|
Oktyabrın
11-də Təhsil Nazirliyində nazirliyin sifarişi
əsasında Təhsil Problemləri İnstitutunda
2011-2012-ci tədris ilində yerinə yetiriləcək
tədqiqat mövzularının müzakirəsinə həsr olunmuş
iclas keçirildi.
Təhsil
Nazirliyinin şöbə müdirləri və Təhsil
Problemləri İnstitutunun rəhbər işçilərinin
iştirak etdiyi iclası təhsil naziri Misir
Mərdanov açaraq təhsil sahəsində müxtəlif
mövzular üzrə tədqiqatların aparılmasının
zəruriliyini diqqətə çatdırdı.
Nazir məlumat
verdi ki, bu zərurət, habelə Təhsil Nazirliyinin
müvafiq şöbələrinin və Dünya Bankının təhsil
üzrə beynəlxalq məsləhətçilərinin tövsiyələri
nəzərə alınaraq Təhsil Problemləri İnstitutunda
2011-2012-ci tədris ilində tədqiqat aparılacaq
mövzuların siyahısı hazırlanıb və nazirliyə
təqdim olunmuşdur. İclas iştirakçılarına
paylanan həmin siyahıda aşağıdakı mövzular
nəzərdə tutulmuşdur:
- Ümumi
təhsildə şagird nailiyyətlərinin
qiymətləndirilməsi (buraxılış imtahanları, ali
və orta ixtisas təhsilinə qəbul imtahanları,
milli qiymətləndirmə və TIMSS, PIRLS beynəlxalq
qiymətləndirmə proqramları) nəticələrinin
tədqiqi.
- İbtidai
təhsildə bütün fənlərin bir müəllim tərəfindən
tədrisi mümkünlüyünün tədqiqi.
- İbtidai
siniflərdə fənn kurikulumlarının tətbiqi
nəticələrinin tədqiqi.
- İcbari
təhsilə uşaqların müsabiqə (test) əsasında
qəbulu problemlərinin tədqiqi.
-
Beşyaşlıların məktəb təliminə hazırlığının
təşkili məsələlərinin tədqiqi.
- Azərbaycanın
regionlarında qızların ümumi təhsilə cəlbində
mövcud olan problemlərin tədqiqi.
Ümumi təhsil
müəssisələrində təlim yükünün və onun
nizamlanması yollarının tədqiqi.
- Ümumi
təhsildə fənn kurikulumlarının, qiymətləndirmə
standartlarının təkmilləşdirilməsi və onların
"Ümumtəhsil məktəblərində məktəbdaxili
qiymətləndirmənin aparılması Qaydaları" əsasında
tətbiqi məsələlərinin tədqiqi.
- Xüsusi
istedada malik uşaqların (gənclərin) yaradıcılıq
potensialının inkişafı üzrə Dövlət Proqramı
(2006-2010) çərçivəsində həyata keçirilmiş
tədbirlərin nəticələrinin qiymətləndirilməsi.
- İlkin
peşə-ixtisas təhsili sahəsində islahatlar və
peşələr üzrə təhsil proqramlarının
(kurikumlarının) hazırlanması və tətbiqi
məsələlərinin tədqiqi.
- İlkin
müəllim hazırlığı proqramlarının tədqiqi və
yeniləşdirilməsi yolları.
Həmin
mövzuları müzakirə etmək üçün yığışdıqlarını
söyləyən nazir yığıncaq iştirakçılarına
mövzularla bağlı öz fikirlərini bildirmələrini
təklif etdi.
Öncə Təhsil
Problemləri İnstitutunun direktoru, professor
Abdulla Mehrabov söz alaraq müzakirənin təşkili
üçün nazirə minnətdarlığını bildirdi və mövzular
haqqında qısa məlumat verdi. Qeyd etdi ki,
Təhsil Nazirliyinin sifarişi ilə aparılacaq
tədqiqat mövzuları müəyyənləşdirilərkən əsasən
tətbiqi xarakterli mövzulara üstünlük
verilmişdir. Müəyyənləşdirilmiş mövzular
institutun şöbələrində və ümumi yığıncağında
müzakirə edildikdən sonra Təhsil Nazirliyinə
təqdim olunmuşdur. Mövzuların əsasən ümumi
təhsilin bəzi aktual problemlərini əhatə
etdiyini deyən A.Mehrabov onların bir çoxunun
institutun fəaliyyət planında öz əksini
tapdığını, ayrı-ayrı mövzuların tədqiqi ilə
bağlı konkret layihələrin hazırlandığını, həmin
layihələrdə icraçılardan tutmuş icra
müddətlərinədək bütün məsələlərin nəzərə
alındığını bildirdi.
Sonra təklif
olunan mövzular ətrafında müzakirələr aparıldı.
Təhsil Nazirliyinin şöbə müdirləri Aydın
Əhmədov, Fərzəli Qədirov, Namiq Məmmədov, Bayram
Hüseynzadə və b. ayrı-ayrı mövzular haqqında öz
fikir və mülahizələrini bildirdilər, təkliflər
irəli sürdülər.
Təhsil
Problemləri İnstitutunun direktoru Abdulla
Mehrabov, direktor müavini, Kurikulum Mərkəzinin
direktoru Ənvər Abbasov, elmi katibi Akif
Abbasov, şöbə müdiri Elxan Bəylərov, TSİL-in
əlaqələndirmə qrupunun rəhbəri Elvin Rüstəmov
bəzi mövzularla bağlı sual və mübahisə doğuran
məsələlərə aydınlıq gətirdilər, təhsil nazirinin
və digər iştirakçıların suallarını
cavablandırdılar.
Müzakirəni
yekunlaşdıran təhsil naziri Misir Mərdanov
müzakirəni faydalı saydığını, təqdim olunan
mövzuların aktual olduğunu, lakin hazırda təhsil
sahəsində aparılan işlərin heç də hamısını əhatə
etmədiyini bildirdi və bu baxımdan tədqiqat
aparılan mövzuların siyahısına hazırda ibtidai
siniflərdə tətbiq olunan dərsliklərin, yeni
təlim texnologiyalarının və İKT-nin tətbiqi ilə
bağlı mövzuların daxil edilməsini, mövzuların
müsabiqə əsasında yazılmasını təklif etdi.
İclasda
təkliflər və əlavələr nəzərə alınmaqla tədqiqat
mövzularına yenidən baxılması, hər mövzu üzrə
tədqiqat aparan şəxslər müəyyənləşdirilməklə bir
qədər geniş məzmunda plan hazırlanması, Təhsil
Nazirliyində hər layihə rəhbərinin 15 dəqiqəlik
təqdimatı dinlənildikdən sonra mövzuların və
layihələrin təsdiq olunması qərara alındı.
Yusif ƏLİYEV |
