Noyabrın
9-da "Təhsil" Respublika İdman Mərkəzinin
Respublika İxtisaslaşdırılmış Olimpiya
Ehtiyatları Uşaq-Gənclər Şahmat Məktəbində
Azərbaycan Respublikasının dövlət
müstəqilliyinin bərpasının 20-ci ildönümünə
həsr olunmuş açıq şahmat turnirinin açılış
mərasimi keçirildi.
Mərasimi giriş sözü ilə "Təhsil" Respublika
İdman Mərkəzinin direktoru Cəfər Hümbətov açaraq
dövlət müstəqilliyimizin bərpasının 20-ci
ildönümünün respublikanın hər yerində təntənə
ilə qeyd olunduğunu diqqətə çatdırdı. Bildirdi
ki, bu bayram münasibəti ilə bütün təhsil
ocaqlarında mütəmadi olaraq tədbirlər keçirilib.
"Təhsil" Respublika İdman Mərkəzində də
müstəqilliyimizə həsr olunmuş bir sıra idman
yarışları təşkil olunub. Bu gün isə Təhsil
Nazirliyinin rəhbərliyi ilə məktəbli
şahmatçıların birinciliyi keçirilir.
Tədbirdə təhsil nazirinin müavini Qulu Novruzov
çıxış edərək şahmat turnirinin açılışı
münasibəti ilə gənc şahmatçıları, məşqçiləri,
müəllimləri və tədbirin digər iştirakçılarını
təbrik etdi. Qeyd etdi ki, bu gün gənc
şahmatçıları burada görmək çox sevindirici
haldır. Şahmat turnirinin Azərbaycanın dövlət
müstəqilliyinin bərpasının 20-ci ildönümünə həsr
olunması çox təqdirəlayiqdir. Ölkəmizdə şahmatın
inkişaf tarixinə nəzər saldıqda son 20 il
ərzində bu müdrik oyunun inkişafı yolunda çox
ciddi addımların atıldığının şahidi olmuş olarıq.
Xüsusilə Azərbaycanda şahmat məktəblərinin,
şahmata cəlb olunan şagirdlərin sayının artması
və şahmatda olan uğurlar, ölkəmizin idman ölkəsi
kimi tanınması çox sevindiricidir. Təkcə onu
demək kifayətdir ki, Azərbaycan Respublikası
Prezidentinin iştirakı ilə son illər 10-dan
artıq şahmat məktəbinin açılışı olmuşdur.
Azərbaycanda bu gün geniş şahmat məktəbləri
şəbəkəsi yaranmışdır. 2009-cu ildən 2014-cü ilə
qədər Azərbaycanda şahmatın inkişaf proqramı
həyata keçirilməkdədir. Proqramda şahmatın
inkişafı və kütləviliyinin təmin olunması hədəf
götürülmüşdür. Bu gün çoxlu sayda turnirlər
keçirilir, qaliblər mükafatlandırılır. Hər yeni
tədbirdə biz şahmatın daha kütləvi xarakter,
turnirlərin daha geniş miqyas aldığını görürük.
Hazırda respublikanın 42 rayon və şəhərindən
350-yə yaxın şahmatçı bu turnirə cəlb olunmuşdur.
Q.Novruzov gənc şahmatçılara uğurlar arzuladı.
Dövlət himni səsləndirildi. Nazir müavini şahmat
məktəbi ilə yaxından tanış oldu, şahmatçılarla
söhbət etdi.
Rəşad ZİYADOV |