|
Cari tədris ilinin əvvəlindən 3 nömrəli Bakı
peşə liseyinin maddi-texniki bazasının
möhkəmləndirilməsi və yeniləşdirilməsi sahəsində
xeyli işlər görülüb.
Liseyin direktoru Solmaz Məmmədova bildirir ki,
bu təhsil ocağında şagirdlərin təlim-tərbiyəsi
ilə 76 mühəndis-pedaqoji işçi məşğul olur. İl
ərzində13 fənn müəllimi və istehsalat təlimi
ustaları ixtisasartırma və 4 istehsalat təlim
ustası isə informasiya və kommunikasiya
texnologiyalarının təhsilə tətbiqi üzrə
kurslarda olmuşlar. Pedaqoji işçilər metodiki
cəhətdən öz bilik və bacarıqlarını daim artırır,
tədrisdə interaktiv təlim metodlarından geniş
istifadə edirlər. Bununla əlaqədar interaktiv,
innovasiya, kurikulumyönümlü "açıq dərs"lər
keçirilir və mütəxəssislərin iştirakı ilə
pedaqoji şurada müzakirə edilir.
Liseydə çalışan müəllimlər həmçinin dərslərini
kabinet və emalatxana sistemində keçirlər.
Burada onların yaxşı işləməsi, şagirdlərin isə
seçdikləri peşələrə dərindən yiyələnməsi üçün
hər cür şərait yaradılıb.
Liseydə şagirdlər çapçı, poliqrafiya üzrə
dizaynçı, mühasib, fərdi kompüter operatoru və
kompüter üzrə operator peşələrinə yiyələnirlər.
Təhsil ocağının idman sahəsində də qazandığı
uğurlar böyükdür. Belə ki, liseyin şagirdləri
keçirilən idman yarışlarında basketbol üzrə I
yer, futbol və voleybol üzrə III yer, güləş üzrə
isə bir nəfər I yer tutmuşlar.
Hazırda pedaqoji kollektiv daha böyük
nailiyyətlər qazanmaq üçün səylə çalışır.
Şakir CƏFƏROV |
