|
 Dekabrın
15-də Təhsil Nazirliyində "Peşə seçiminə dəstək
sistemi" layihəsinin təqdimat mərasimi keçirildi.
Tədbirdə Azərbaycan Respublikasının təhsil
naziri Misir Mərdanov, nazirliyin müvafiq şöbə
və struktur bölmələrinin rəhbərləri və layihəni
təqdim edən Türkiyə Respublikasının "Kavrakoğlu"
şirkətinin nümayəndələri-şirkətin təsisçisi
Füsun Kavrakoğlu, vitse-prezidenti Asuman
Kuzuoğlu, icraçı direktorları Dilek Bağdatıoğlu,
Zeki Gün və digər qonaqlar iştirak edirdilər.
Tədbirdə öncə Asuman Kuzuoğlu "Peşə seçiminə
dəstək sistemi" (PSDS) layihəsi haqqında
təqdimatı iştirakçıların diqqətinə çatdırdı.
Verilən məlumata görə, layihənin həyata
keçirilməsində əsas məqsəd ibtidai və orta
məktəb şagirdlərinə peşə seçimlərində kömək
olaraq təhsillərini hansı istiqamətdə davam
etdirmələrinin uyğun olacağını, iş və peşə əldə
etmək istəyən yeniyetmələr və ya təhsildən
kənarda qalan şəxslərin peşə əldə etmələrinə yol
göstərmək, bu məqsədlər istiqamətində şəxslərin
tədris müəssisələrini və peşələri tanıya
bilmələri üçün şərait yaratmaq, onlayn qeydiyyat
vasitəsilə müxtəlif hesabatların daha tez zaman
ərzində və avtomatlaşdırılmış şəkildə
hazırlanmasıdır.
PSDS-nin əsas hədəfi gəncləri qabiliyyətləri,
maraq sahələri və fərdi seçimlərinə uyğun
təhsilə yönəltmək, peşə təhsili ilə əlaqədar
mənfi fikirlərin silinərək təhsilli işçi
qüvvəsinin yaradılmasına kömək etmək, ölkə
daxilindəki təhsil müəssisələrinin tanıdılması,
əldə edilən statistik məlumatın köməyi ilə
məşğulluq imkanlarının inkişaf etdirilməsidir.
Məruzəçi təqdimatında e-hökümət üzrə başlanmış
işlərin bir hissəsi olan PSDS ilə bağlı bir sıra
məsələlərdən bəhs etdi, layihənin həyata
keçirilməsindən gözlənilən nəticələri və
Azərbaycanda bu sistemin istifadəyə keçid
müddətini diqqətə çatdırdı. Sonra təqdimatla
bağlı müzakirə aparıldı. Geniş fikir mübadiləsi
şəraitində keçən müzakirədə bir sıra maraqlı
təkliflər səsləndi.
Layihənin əhəmiyyətindən söz açan təhsil naziri
Misir Mərdanov onun mahiyyətinin geniş
ictimaiyyətə çatdırılmasının, bu məqsədlə
müxtəlif maarifləndirmə tədbirlərinin həyata
keçirilməsinin zəruri olduğunu vurğuladı. Nazir
"Peşə seçiminə dəstək sistemi" layihəsinin
gələcəkdə böyük fayda verəcəyinə əmin olduğunu
söylədi.
Tədbirdə şirkətin vitse-prezidenti Asuman
Kuzuoğlu "Təhsildə texnoloji dəyişiklik"
mövzusunda da təqdimat etdi.
Hicran ƏKBƏROVA |
