Azərbaycanın ümumtəhsil müəssisələrində riyaziyyat-texniki və təbiət fənləri, eləcə də bədii yaradıcılıq, incəsənət, idman sahələri üzrə təhsil alan istedadlı şagirdlərin siyahısı hazırlanacaqdır. Təhsil Nazirliyindən AzərTAc-a bildirmişlər ki, 2012-ci ilin mart ayınadək yerli təhsil orqanları tərəfindən həmin şagirdlərin siyahısı hazırlanaraq nazirliyə təqdim ediləcəkdir. Həmin siyahı əsasında nazirlikdə "İstedad bankı" yaradılacaqdır.

Bununla yanaşı, 2012-ci ilin birinci yarısında istedadlı uşaq və gənclər haqqında internet portalı yaradılacaqdır. İstedadlı uşaq və gənclərlə aparılan işlərin təkmilləşdirilməsi ilə bağlı tədqiqatlar genişləndiriləcəkdir.

Yanvar-fevral aylarında isə tədqiqatların aparılması üçün pilot müəssisələr seçiləcəkdir.