Təhsil Nazirliyinin müvafiq təlimati məktubuna uyğun olaraq yanvarın 8-də respublikanın bütün şəhər və rayonlarında fənn olimpiadalarının  rayon (şəhər) turunun ikinci mərhələsi keçirilib.  Bakı Şəhəri üzrə Təhsil İdarəsindən aldığımız məlumata görə, olimpiadaların II şəhər mərhələsində paytaxtın təhsil ocaqlarında oxuyan 1044 şagird iştirak edib. Onlar 7 fənn üzrə biliklərini sınayıblar. Əvvəlki mərhələnin 8500-ə yaxın iştirakçısı arasından seçilən şagirdlər Azərbaycan tarixi, Azərbaycan dili və ədəbiyyat fənləri üzrə 42 nömrəli, kimya və biologiya fənləri üzrə 258 nömrəli, fizika, riyaziyyat və informatika fənləri üzrə isə 158 nömrəli tam orta məktəblərində yaradılan mərkəzlərdə olimpiadaya cəlb ediliblər.

IX-XI sinif şagirdləri 3 saat ərzində Təhsil Nazirliyinin təqdim etdiyi sualları cavablandırıblar. Cavablar fənn müəllimlərindən təşkil edilən komissiya tərəfindən gün ərzində yoxlanılaraq Bakı Şəhəri üzrə Təhsil İdarəsinə təqdim edilib. Nəticələr ümumiləşdirildikdən və qaliblərin siyahısı bəlli olduqdan sonra yanvarın 25-dək Təhsil Nazirliyinə müvafiq məlumat göndəriləcək.

Fənn olimpiadalarının şəhər mərhələsində I yeri tutanlar bu ilin martında keçiriləcək respublika mərhələsində iştirak hüququ qazanacaqlar.

Məlumat üçün bildirək ki, olimpiadanın respublika mərhələsində birinci yerə  layiq görülən XI sinif şagirdləri mərkəzləşdirilmiş buraxılış imtahanlarından azad olunurlar. 

Y.ƏLİYEV