Naxçıvan Müəllimlər İnstitutunda  iqtisad elmləri doktoru, professor  Nazim Əhmədovun anadan olmasının  65 illik yubileyi münasibətilə  yığıncaq keçirilmişdir. Yığıncağı  ali təhsil ocağının rektoru, professor Oruc Həsənli açaraq alimin həyat yolu, elmi-pedaqoji fəaliyyəti barədə danışmışdır. Qeyd olunmuşdur ki, Nazim Əhmədov iqtisad elminin inkişafında mühüm xidmətlər göstərir. O, "Heydər Əliyevin iqtisadi inkişaf modeli və Naxçıvan", "Naxçıvan iqtisadiyyatı inkişaf yollarında", "Naxçıvan iqtisadiyyatının prioritetləri; iqtisadi artım, dinamik inkişaf" adlı monoqrafiyalarının, eləcə də "İstehlak bazarının tənzimlənməsi problemləri" adlı dərs vəsaitinin və 200-dən artıq məqalənin müəllifidir. Professor Nazim Əhmədovun əməyi yüksək qiymətləndirilərək 2007-ci ildə "Tərəqqi" medalı ilə təltif edilmişdir.

Tədbirdə institutun elmi işlər üzrə prorektoru Yaqub Məmmədov, pedaqoji fakültənin dekanı Azad Novruzov, tərbiyə işləri üzrə prorektoru Sədaqət Həsənova, pedaqogika və psixologiya kafedrasının müdiri Qızıltac Şahbazova və başqaları çıxış edərək yubilyarı təbrik etmişlər.

Sonda yubilyar çıxış edərək  tədbirin təşkilatçılarına və iştirakçılarına diqqətə, əməyinə verilən qiymətə görə minnətdarlığını bildirmişdir. 

Naxçıvan Müəllimlər İnstitutunun Mətbuat xidməti