Bakının Xətai rayonundakı 257 nömrəli tam orta məktəbdə İKT biliklərinin artırılması məqsədi ilə həyat bilgisi fənnindən  "Müstəqil respublikamız" adlı "açıq dərs" keçirildi. Əvvəlcə tədbir iştirakçıları şagirdlərin  "açıq dərs"ə həsr olunmuş  əl işlərindən ibarət sərgi ilə tanış oldular.

Sonra qonaqlar III "y" sinfində Svetlana Məmmədovanın "açıq dərs"ində iştirak etdilər. Dərs prosesində əqli hücum, müqayisə, diskussiya və s. üsullardan məharətlə istifadə olundu. Dərsin bütün mərhələlərində  müxtəlif mövzuları əhatə edən şəkillər, dialoqlar, cümlələr üçüncülərə elektron lövhədə göstərildi. Əvvəlcə şagirdlər beş qrupa - "Qəhrəmanlıq", "Mübariz", "Mətin", "İgidlik", "Hünər" qruplarına  bölündü.  Sonra təhlil olunacaq mövzu haqqında ümumi anlayış yaradıldı. Müstəqil respublikamızın tarixi haqqında geniş məlumat verildi. Müəllim Azərbaycanı müstəqil ölkə kimi dünyaya tanıtdıran ulu öndər Heydər Əliyevin əvəzsiz xidmətlərindən danışdı. Hər qrupun şagirdlərinə müstəqilliyimizin tarixi, dövlətçiliyimiz haqqında müxtəlif suallar verildi. Üçüncülər sualları çətinlik çəkmədən cavablandırdılar. Sonra krossvord şəklində sözlər şagirdlərə təqdim olundu. Hər qrupun lideri  verilən tapşırığın yerinə yetirilməsi haqqında məlumat verdi.

"Müstəqil respublikamız" mövzusunda film şagirdlərə nümayiş  etdirildi. Şagirdlər müstəqilliyimizə və ulu öndər Heydər Əliyevə həsr olunmuş şeirlər söylədilər, mahnılar ifa etdilər.  Müəllim şagirdlərdən ibarət münsiflər heyətinin birgə razılığı  ilə qrupları qiymətləndirdi.

Müzakirələrdə "açıq dərs" qonaqlar tərəfindən yüksək qiymətləndirildi.  

Rəşad ZİYADOV