Son
illər təhsilimizdə uğurla həyata keçirilən islahatların
ən mühüm nəticələrindən biri müəllimlər arasında
canlanma yaratması, onları innovativ axtarışlara qoşması,
dərslərində yeni təlim forma və üsullarının tətbiqi
istiqamətində yaradıcı fəaliyyətinə təkan verməsidir.
Dərslərində fəal təlimdən, müasir interaktiv təlim metod
və üsullarından səmərəli istifadə etməklə diqqətəlayiq
uğurlar qazanan belə müəllimlərdən biri də 1981-ci ildən
Bakıdakı 263 nömrəli məktəbdə riyaziyyat müəllimi
işləyən Məhburə Həsənovadır. O, həmkarları arasında
yüksək biliyi, pedaqoji ustalığı, elmi-metodiki bacarığı
ilə seçilir. İşinə yaradıcı münasibət, tədris etdiyi
fənni şagirdlərə mənimsətməyin ən effektiv metodlarını
düşünüb tapmaq onun pedaqoji fəaliyyətinin əsas
qayəsidir.
1996-1997-ci tədris ilində sinif rəhbəri olduğu 22
şagirdin hamısının ali məktəbə daxil olması faktı hələ o
vaxt təhsilimizdə yüksək nailiyyət kimi
qiymətləndirilmişdi. Onların çoxu dəqiq elmlər üzrə
ixtisas seçən məzunlar idi. Qeyri-adi uğurda, sözsüz ki,
Məhburə Həsənovanın zəhməti xüsusi qeyd olunurdu. Elə
həmin il Məhburə müəllimin "Riyaziyyat dərslərində
müstəqil işlərin təşkili" mövzusunda qabaqcıl iş
təcrübəsinin rayon müəllimləri arasında yayılması və
öyrənilməsi haqqında qərar qəbul olundu. Qərarda Məhburə
Həsənovanın pedaqoji fəaliyyətində intensiv metodlardan
hesab olunan kodlaşdırılmış kartoçkalarla təlim metoduna
üstünlük verilməsi ən effektiv iş üsulu kimi qeyd olundu.
Bu metod tədrisin keyfiyyət göstəricisində əhəmiyyətini
hələ də qorumaqdadır.
Məhburə Həsənova tədris prosesində dərsliklərdən əlavə
didaktik materiallardan da yaradıcılıqla bəhrələnir.
Onun kartotekasındakı çalışmalar həm say zənginliyi, həm
də məzmun genişliyi ilə diqqət çəkir. Texniki təlim
vasitələrinin, tədris materialına uyğun plakat, tablo və
cədvəllərin bolluğu mövzuların asan qavranılmasına kömək
edir. O, şagirdlər arasında dərsin növünə, mövzunun
tələbinə uyğun yarış xarakterli müstəqil işlər təşkil
edir.
1970-ci ildən pedaqoji fəaliyyətdə olan Məhburə Həsənova
ötən illərin şirin, unudulmaz xatirələrindən söz düşəndə
Gəncə Dövlət Pedaqoji İnstitutunun riyaziyyat
fakültəsini bitirib təyinatı üzrə doğma kəndində -
Yevlax rayonu Varvara kənd orta məktəbində müəllimliyə
başladığı ilk günün həyəcanını indi də unutmadığını
deyir.
Ötən ilin dekabrında paytaxtın ümumtəhsil
müəssisələrində keçirilən "Riyaziyyat aylığı" Məhburə
müəllimin fəal iştirakı ilə 263 nömrəli məktəbdə əsl
bilik bayramına çevrildi. O, şagirdlərin iştirakı ilə
iki sinifdə üç divar qəzeti çıxardı, riyaziyyat fənninin
digər elm sahələri ilə əlaqəsinə həsr edilən müstəqil
şagird işlərinin, referatların yazılmasına nail oldu.
Aylığın sonunda məktəb üzrə "Riyaziyyat gecəsi"ni təşkil
etdi, "Riyaziyyat və estetik tərbiyə" mövzusunda geniş
məruzəsi ilə tədbirə yekun vurdu.
Məhburə Həsənova dəfələrlə rayon təhsil şöbəsinin fəxri
fərmanına, mükafatlarına layiq görülüb. İş təcrübəsi bu
gün də həmkarlarına örnək göstərilir. Yetirmələrinin
ölkəmizin ictimai həyatında fəal iştirakından qürur
duyan Məhburə Həsənova bu gün də öz işinə yaradıcı
yanaşır, təhsilin, tədrisin keyfiyyətini daha da
yüksəltmək üçün innovativ axtarışlarını davam etdirir.
Nazim ƏLİFOV |